Taraptar saiasi, saýda-ekonomikalyq jáne mádeni-gýmanitarlyq salalardaǵy Qazaqstan-Ońtústik Koreia yntymaqtastyǵynyń jai-kúii men damý perspektivalaryn, sondai-aq kópjaqty formattaǵy ózara is-qimyldy talqylady.
QR syrtqy saiasi vedomstvosynyń basshysy Murat Nurtileý Koreia Respýblikasy Qazaqstannyń Aziiadaǵy negizgi áriptesteriniń biri ekenin atap ótti. «Dostyq pen ózara senimge negizdelgen Ońtústik Koreiamen áriptestikti damytý – elimizdiń syrtqy saiasatyndaǵy mańyzdy basymdyqtarynyń biri. Qazaqstanda jumys isteýge nietti korei kompaniialary úshin qolaily jaǵdai jasaýǵa biz tolyq daiynbyz», – dedi Ministr.
Óz kezeginde, Ministr Pak Jin Seýl eki el arasynda qalyptasqan senimdi qatynastar negizinde korei-qazaq keńeitilgen strategiialyq áriptestigin damytýǵa nietti ekenin aitty. Ol Qazaqstanda júrgizilip jatqan áleýmettik-ekonomikalyq reformalar men saiasi ózgeristerdi joǵary baǵalady. «Biz ekonomikalyq damý salasyndaǵy óz tájiribemiz negizinde Qazaqstanǵa qoldaý kórsetýdi odan ári de jalǵastyratyn bolamyz» - dedi Ońtústik Koreia SIM basshysy.
Taraptar eki el arasyndaǵy ózara is-qimyldy nyǵaitýǵa, onyń ishinde saýda-ekonomikalyq jáne investitsiialyq yntymaqtastyqty arttyrý jolymen ózara múddelilik bildirdi. 2022 jyldyń qorytyndysy boiynsha 6,1 mlrd AQSh dollaryna jetken ózara taýar ainalymynyń eki ese ulǵaiýy qanaǵattanýshylyqpen atalyp ótti.
Ońtústik Koreia – Qazaqstandaǵy eń iri 10 investordyń biri jáne Aziiada aýqymy jaǵynan ekinshi saýda seriktesi. QR ekonomikasyna salynǵan korei tikelei investitsiialar kólemi 1,5 mlrd AQSh dollaryna jetti. Bul ekijaqty investitsiialyq yntymaqtastyq tarihyndaǵy eń úlken kórsetkish. Qazaqstanda korei biznesiniń qatysýymen 740 kompaniia tirkelip, 28 iri joba iske asyryldy.
QR-daǵy «altyn kópirdei» eki el arasyndaǵy dostyqty nyǵaitýǵa yqpal etetin korei diasporasynyń róline erekshe nazar aýdaryldy. Búgingi tańda Qazaqstanda 119 myńnan astam etnikalyq kárister turady.
Sonymen qatar Qazaqstan men Ońtústik Koreianyń syrtqy saiasi vedomstvolarynyń basshylary kóptegen óńirlik jáne halyqaralyq máseleler boiynsha elderdiń uqsas ustanymdarda ekenin, al kópjaqty diplomatiiada ózara qoldaý jolǵa qoiylǵanyn atap ótti.
Eki el azamattarynyń eńbek jáne kóshi-qon quqyqtaryn qamtamasyz etý máseleleri kelissózderdiń jeke taqyryby boldy. M. Nurtileý Qazaqstan azamattarynyń Ońtústik Koreiada zańdy túrde jumysqa ornalasýyn qamtamasyz etýdiń mańyzdylyǵyna, ásirese Qazaqstandy Koreianyń «Eńbekke ruqsat berý júiesiniń» tizimine qosýǵa nazar aýdardy.
Taraptar múddelilik tanytyp otyrǵan barlyq máseleler boiynsha úzdiksiz jáne dáiekti jumysty jalǵastyrý úshin 2023-2024 jyldarǵa arnalǵan Syrtqy ister ministrlikteri arasyndaǵy yntymaqtastyq jónindegi ózara túsinistik týraly memorandýmǵa qol qoidy.
