Astanada QR Ulttyq mýzeiiniń 10 jyldyǵyna arnalǵan Qazaqstan mýzei kongresi ótti. Oǵan 12 elden 100-den astam zertteýshiler men murajai qyzmetkerleri qatysty. Aýqymdy shara aiasynda QR Mádeniet jáne aqparat ministri Aida Balaeva Lývr mýzeiiniń Islam óneri departamentiniń direktory Sýraia Nýdjaiymmen jáne Frantsiianyń Qazaqstandaǵy Tótenshe jáne Ókiletti Elshisi Silvan Giogemen kezdesý ótkizdi, – dep habarlaidy Dalanews.kz.
Taraptar Qazaqstan men Frantsiia arasyndaǵy mádeni bailanystardy nyǵaitý, yntymaqtastyqty keńeitý máselelerin talqylady. Ministr eki eldiń tarihi-mádeni murasyn zertteý aiasynda Astana men Parij arasyndaǵy ǵylymi-zertteý jumysyndaǵy áriptestikti odan ári nyǵaitýdy usynyp, mýzei isi salasyndaǵy birlesken zertteýlerdiń mańyzdylyǵyn atap ótti.
Aida Balaeva frantsýz áriptesterine tájiribe almasýǵa jáne eki eldiń mýzeileri arasyndaǵy yntymaqtastyqty nyǵaitýǵa yqpal etetin simpoziýmdar, kórmeler men ǵylymi konferentsiialar, treningter men seminarlar uiymdastyrýdy usyndy.
– Búgingi kezdesýimiz óte mańyzdy. Bul bizdiń Gime mýzeii siiaqty Lývrmen de tyǵyz yntymaqtastyqta bolyp, jumys isteýimizge yqpal etedi dep oilaimyn. Ministr retinde men ǵylymi yntymaqtastyqqa múddelimin. Birlesken kúsh-jigerimiz jańa, buǵan deiin beimálim bolyp kelgen tarihi derekter men jádigerlerdi ashýǵa múmkindik beretinine senimdimin. Basym baǵyt ǵylymi zertteýler bolýy kerek. Bul eki el úshin de úlken múmkindikter ashady. Qazaq mádenieti halyqaralyq ǵylymi qaýymdastyqtyń nazaryna ilikken biregei jádigerlerge bai. Degenmen, áli ashylmaǵan qyrlary da jeterlik, – dei kele ministr Lývr mamandaryn Qazaqstanǵa kelýge shaqyrdy.
Óz kezeginde Sýraia Nýdjaiym eki el yntymaqtastyǵyn keńeitýge múddelilik tanytyp, Lývrdyń mádeni murany restavratsiialaý jáne zertteý salasynda birlesken zertteýler júrgizýge múddeli bolatynyn atap ótti.
– Ǵylymi yntymaqtastyqty damytý biz úshin de óte qyzyqty. Bul baǵytta áriptestik ornatýǵa daiynbyz. Birlesken zertteýler Qazaqstannyń mádenieti týraly bilimimizdi keńeitip, eki tarap úshin de mańyzdy jańalyqtar ashýǵa múmkindik beredi, – dedi Lývr murajaiynyń Islam óneri departamentiniń direktory.
Kezdesýde Frantsiianyń Qazaqstandaǵy Tótenshe jáne ókiletti elshisi Silvan Gioge eki el úshin ǵylymi yntymaqtastyqtyń bolashaǵy zor sala ekenin atap ótti. Sondai-aq, Frantsiia elshiliginiń osy jobalardy júzege asyrýǵa kómektesýge, ǵylym, mádeniet salalaryndaǵy áriptestikti damytýǵa daiyn ekenin aitty.
Kezdesýde Qazaqstan men Frantsiia arasyndaǵy mádeni jáne ǵylymi bailanystardy nyǵaitýǵa negiz bolatyn yntymaqtastyq jónindegi baǵdarlama men qujatty túbegeili ázirleý týraly sheshim qabyldandy.
