Kabýl qalasynda ótken kezdesýde QR Premer-mınıstriniń orynbasary – ulttyq ekonomıka mınıstri Serik Jumanǵarın men Aýǵanstan Islam Ámirliginiń Ken óndirý jáne munaı mınıstri Hedaıatýlla Badrı kelisim jasasty, dep habarlaıdy Dalanews.kz.
Kezdesý barysynda taraptar ótken bir jyl ishinde ónerkásip salasyndaǵy ekijaqty qatynastardyń aıtarlyqtaı ilgerileýine rızashylyqtaryn bildirdi. Serik Jumanǵarın aýǵan tarapyna Qazaqstannan jetkizilgen geologtardyń qatty paıdaly qazbalardyń áleýetti ken oryndaryn zertteý boıynsha dalalyq jumystaryn uıymdastyrýǵa qoldaý kórsetkeni úshin alǵysyn bildirdi.
"Búgingi tańda Qazaqstan geologıalyq barlaý, qatty paıdaly qazbalardy óndirý jáne óńdeý salasynda tájirıbesi bar kásibı taý-ken kompanıalary pýlyn qurdy. Bul kompanıalar áleýetti ken oryndaryn izdeýge jáne ınvestısıa salýǵa múddeli. Osy baǵytty talqylaý úshin qazaqstandyq delegasıa quramynda ERG Exploration, Kazakhmys Barlau jáne Qazatomónerkásip kompanıalarynyń ókilderi keldi", — dedi Serik Jumanǵarın.
Kezdesý barysynda aýǵan tarapy yntymaqtastyqty odan ári damytýǵa jáne qazaqstandyq mamandardyń zertteý jumystaryna qoldaý kórsetýge daıyn ekenin jetkizdi.
Taraptar barlyq týyndaǵan máselelerdi jedel talqylaý úshin birlesken tehnıkalyq komısıa qurýǵa ýaǵdalasty.
Mamyr aıynyń sońynda Qazaqstan tarapy Aýǵanstannyń basqa provınsıalaryndaǵy áleýetti ken oryndaryn zertteý úshin taǵy bir mamandar tobyn jibermek.
Sonymen qatar aýǵan tarapy qazaqstandyq taý-ken kompanıalarynyń suranysy boıynsha tabıǵı resýrstardyń rastalǵan qory týraly málimetter berýge daıyn ekenin bildirdi.
Sondaı-aq Serik Jumanǵarın Aýǵanstan Islam Ámirliginiń Memlekettik kompanıalar basqarmasynyń basshysy Ahmad Djan Bılalmen kezdesti.
Taraptar qazaqstandyq kásiporyndardyń Aýǵanstan memlekettik kompanıalarymen yntymaqtastyǵyn keńeıtý múmkindikterin talqylady.
140 mln dollardyq kelisimder: Qazaqstan–Aýǵanstan bıznes forýmynyń qorytyndysy
Serik Jumanǵarın Qazaqstan–Aýǵanstan bıznes forýmynyń ashylýyna qatysty. Sharaǵa ósimdik maıy, makaron, kúrishten bastap agrodrondar men akýmýlátorlarǵa deıingi taýarlardy usynǵan 25 qazaqstandyq kompanıa qatysty.
"Aýǵanstan Ortalyq jáne Ońtústik Azıa arasyndaǵy mańyzdy logıstıkalyq habqa aınala alady, al Qazaqstan – azyq-túlik, tehnologıa, mashına jasaý, hımıa jáne IT ónimderiniń senimdi jetkizýshisi bola alady. Aldymyzǵa ambısıaly, biraq qoljetimdi maqsat qoıyldy ıaǵnı, saýda aınalymyn qysqa merzimde 3 mlrd dollarǵa deıin jetkizý. Bul maqsatqa jetý úshin turaqty jetkizý arnalary qurylyp, ózara saýda nomenklatýrasy keńeıip, ınvestısıalar men kásipkerlik belsendilikke qolaıly jaǵdaı jasalýy qajet", — dep atap ótti vıse-premer.
Forýmnyń alǵashqy kúniniń aldyn ala qorytyndysy boıynsha shamamen 140 mln dollar somasyna komersıalyq qujattarǵa qol qoıyldy.
