Qazaqstan VI Dúniejúzilik kóshpendiler oiyndarynda alǵashqy altyn júldesin jeńip aldy. Aýdaryspaqtan ótken jarysta Kárim Nurtalap finalda qyrǵyz balýanyn jeńip, chempion atandy, dep habarlaidy dalanews.kz.
Sheshýshi báseke Qazaqstan ókiliniń jeńisimen aiaqtaldy.
Kárim Nurtalap aýdaryspaqtan chempion atandy
Kárim Nurtalap aýdaryspaq jarysynda Qazaqstan qorjynyna VI Dúniejúzilik kóshpendiler oiyndarynyń alǵashqy altyn medalin saldy.
Aýdaryspaq – qazaqtyń ulttyq at sporty. Bul saiysta sportshylar at ústindegi eptiligin, tepe-teńdikti saqtai bilýin jáne atty basqarý sheberligin kórsetedi.
Kóshpendiler oiyndary Qyrǵyzstanda ótip jatyr
VI Dúniejúzilik kóshpendiler oiyndary Qyrǵyzstanda 2026 jylǵy 31 tamyz ben 6 qyrkúiek aralyǵynda ótedi. Ashylý saltanaty Bishkektegi "Bishkek Arena" stadionynda uiymdastyryldy.
1 qyrkúiekte jarysqa qatysýshylar Ystyqkól oblysyndaǵy Sholpan-Ata qalasyna jetkizilip, ornalastyryldy.
Negizgi sporttyq saiystar men mádeni baǵdarlamalar 2-6 qyrkúiek aralyǵynda Sholpan-Atada jáne Ystyqkól mańynda ótedi. Jabylý saltanaty 6 qyrkúiekte kól jaǵasynda uiymdastyrylady.
Dúniejúzilik kóshpendiler oiyndaryna 113 elden shamamen 3 myń sportshy qatysyp jatyr.
Jarys baǵdarlamasyna 43 ulttyq jáne dástúrli sport túri engizilgen. Olar segiz negizgi baǵytqa bólingen. Atap aitqanda, álem halyqtarynyń ulttyq oiyndary, at jarystary men at ústindegi saiystar, ulttyq kúres túrleri, dástúrli kúsh sporttary, ziiatkerlik oiyndar, dástúrli sadaq atý, qyran qustarmen jáne ańshy ittermen ańshylyq jasaý, sondai-aq etnosporttyq básekeler bar.
