Qazaqstanda kómir óndirý kólemin 2026 jyly 128,9 mln tonnaǵa deiin jetkizý josparlanyp otyr, dep habarlaidy dalanews.kz.
Energetika ministrliginiń málimetinshe, qazirgi ýaqytta elde kómir óndirýmen 40 jer qoinaýyn paidalanýshy ainalysady.
Vedomstvo deregine sáikes, 2025 jyldyń qorytyndysynda kómir óndirý kólemi 115 mln tonnany quraǵan. Bul 2024 jylmen salystyrǵanda 7%-ǵa joǵary.
Ótken jyly óndirilgen kómirdiń 85 mln tonnasy ishki tutyný men kommýnaldyq turmystyq qajettilikterge baǵyttalǵan.
Al eksport kólemi 30 mln tonna bolǵan.
Qazaqstan kómiriniń negizgi eksporttyq baǵyttary qatarynda Resei, Polsha, Ózbekstan, Túrkiia, Úndistan, Malaiziia jáne basqa elder ataldy.
Energetika ministrligi málimetinshe, 2025 jyly salaǵa tartylǵan investitsiia kólemi kelisimsharttardyń jumys baǵdarlamalary aiasynda 305 mlrd teńgeni quraǵan.
Al 2026 jyly kómir salasyna shamamen 553 mlrd teńge investitsiia tartý kútilip otyr.
Sonymen qatar jyl sońyna deiin kómir ken oryndary boiynsha jer qoinaýyn paidalaný quqyǵyn berý úshin 10 ýchaske boiynsha aýktsion ótkizý josparlanǵan.
Vedomstvonyń deregine sáikes, Qazaqstan kómir qory boiynsha álemde onynshy orynda tur.
Eldegi jalpy kómir qory 33,6 mlrd tonnaǵa baǵalanyp otyr.
Ministrlik málimetinshe, qazirgi óndirý kólemi saqtalǵan jaǵdaida bul qor Qazaqstandy 300 jyldan astam ýaqytqa jetkilikti resýrspen qamtamasyz ete alady.
