Qazaqstan quramasy mektep oqýshylaryna arnalǵan Halyqaralyq jasandy intellekt olimpiadasynda (IOAI 2025) eń úzdik nátijelerdiń birin kórsetip, 3 altyn, 1 kúmis jáne 3 qola medal jeńip aldy. Bul doda oqýshylardyń jasandy intellekt men tehnikalyq bilim salasyndaǵy daiyndyq deńgeiin kórsetti,- dep habarlaidy Dalanews.kz
Olimpiada 2–9 tamyz aralyǵynda Beijińde ótip, 61 elden kelgen 77 komandany jinady. Qazaqstan atynan oǵan eki komanda qatysyp, qurama úzdikter qatarynan tanyldy.
Osylaisha, altyn medal iegerleri – Qasymqan Jánibek, Ábý Qanabek jáne Sultanbi Isatai atansa, kúmis medaldi Aýshahman Tálim jeńip aldy, al qola medal Timýr Shakýov, Dáýjan Beketov pen Sultanbek Saryǵa buiyrdy.
Sondai-aq, IOAI uiymdastyrý komitetiniń maqtaý qaǵazymen Batyr Erdenov marapattaldy.
Altyn medal sany boiynsha beiresmi esepte Qazaqstan 3 altynmen Polsha, Úndistan jáne Vetnammen ekinshi oryndy bólisti. Birinshi oryndy Resei komandasy (6 altyn medal) ielendi. Sonymen qatar úzdik ondyqqa Singapýr (2 altyn), Rýmyniia, Japoniia, Shvetsiia jáne Gonkong-Qytai (árqaisysy 1 altyn) kirdi.
IOAI – bul ǵylymi jáne praktikalyq bólimderdi biriktiretin bedeldi halyqaralyq jarys. Onda qatysýshylar jeke jáne komandalyq túrde beine men sýret generatsiiasy, mashinalyq oqytý, tabiǵi tildi óńdeý, kompiýterlik kórý jáne basqa da baǵyttardaǵy jasandy intellektke negizdelgen sheshimderdi ázirleý boiynsha tapsyrmalardy oryndaidy.
Baiqaý baǵdarlamasynan bólek, olimpiada aiasynda álemniń jetekshi sarapshylarynyń dáristeri, etikalyq pikirtalastar, mádeni jáne bilim berý is-sharalary uiymdastyrylady. Jarystyń maqsaty – jastar arasynda jasandy intellektti nasihattaý.
Qazaqstan quramasynyń bas seriktesi Astana Hub halyqaralyq innovatsiialyq klasteri atandy.
Astana Hub komanda daiyndyǵyna eleýli úles qosyp, ulttyq quramanyń álemdik arenadaǵy qatysýyna qoldaý kórsetti jáne Qazaqstannyń jasandy intellekt salasyndaǵy jańa ortalyq retinde bedelin nyǵaitty.
Qazaqstan quramasynyń Olimpiadaǵa qatysýyn uiymdastyrýshy - Qazaqstannyń sporttyq baǵdarlamalaý federatsiiasy (CPFED). Federatsiianyń maqsaty - halyq arasynda sporttyq baǵdarlamalaýdy nasihattaý jáne damytý, sondai-aq qazaqstandyq qatysýshylardyń respýblikalyq jáne halyqaralyq jarystardaǵy nátijelerin arttyrý.
Qatysýshylardy irikteý men daiyndaýdan bastap sapardy uiymdastyrýǵa deiingi jan-jaqty qoldaýdyń arqasynda CPFED ulttyq quramanyń sapaly daiyndalýyn qamtamasyz etti. Bul - olardyń sátti óner kórsetýine yqpal etken negizgi faktorlardyń biri boldy.
Qazaqstan quramasynyń bul jetistigi IT-bilim berýdiń joǵary deńgeiin jáne oqýshylardyń ozyq tehnologiialarǵa degen qyzyǵýshylyǵyn dáleldeidi. IOAI 2025 olimpiadasyndaǵy jeńis – bul tálimgerlerdiń júieli eńbeginiń, bilim berý bastamalaryn qoldaýdyń jáne jasandy intellekttiń bolashaǵyn búginnen bastap qalyptastyrýǵa daiyn jas mamandar qataryn arttyrýdyń nátijesi bolyp otyr.
Ministrlik Olimpiadaǵa qatysý barysynda qoldaý kórsetken barlyq jandarǵa shyn júrekten alǵys bildiredi. Bul nátije Sporttyq baǵdarlamalaý federatsiiasy @cpfed.kz, Astana Hub, sondai-aq ata-analar men ustazdardyń qoldaýynyń arqasynda múmkin boldy.
