قازاقستان قۇراماسى مەكتەپ وقۋشىلارىنا ارنالعان حالىقارالىق جاساندى ينتەللەكت وليمپياداسىندا (IOAI 2025) ەڭ ۇزدىك ناتيجەلەردىڭ ءبىرىن كورسەتىپ، 3 التىن، 1 كۇمىس جانە 3 قولا مەدال جەڭىپ الدى. بۇل دودا وقۋشىلاردىڭ جاساندى ينتەللەكت مەن تەحنيكالىق ءبىلىم سالاسىنداعى دايىندىق دەڭگەيىن كورسەتتى،- دەپ حابارلايدى Dalanews.kz
وليمپيادا 2–9 تامىز ارالىعىندا بەيجىڭدە ءوتىپ، 61 ەلدەن كەلگەن 77 كوماندانى جينادى. قازاقستان اتىنان وعان ەكى كوماندا قاتىسىپ، قۇراما ۇزدىكتەر قاتارىنان تانىلدى.
وسىلايشا، التىن مەدال يەگەرلەرى – قاسىمقان جانىبەك، ءابۋ قانابەك جانە سۇلتانبي يساتاي اتانسا، كۇمىس مەدالدى اۋشاحمان ءتالىم جەڭىپ الدى، ال قولا مەدال تيمۋر شاكۋوۆ، ءداۋجان بەكەتوۆ پەن سۇلتانبەك سارىعا بۇيىردى.
سونداي-اق، IOAI ۇيىمداستىرۋ كوميتەتىنىڭ ماقتاۋ قاعازىمەن باتىر ەردەنوۆ ماراپاتتالدى.
التىن مەدال سانى بويىنشا بەيرەسمي ەسەپتە قازاقستان 3 التىنمەن پولشا، ءۇندىستان جانە ۆەتناممەن ەكىنشى ورىندى ءبولىستى. ءبىرىنشى ورىندى رەسەي كومانداسى (6 التىن مەدال) يەلەندى. سونىمەن قاتار ۇزدىك وندىققا سينگاپۋر (2 التىن)، رۋمىنيا، جاپونيا، شۆەسيا جانە گونكونگ-قىتاي (ءارقايسىسى 1 التىن) كىردى.
IOAI – بۇل عىلىمي جانە پراكتيكالىق بولىمدەردى بىرىكتىرەتىن بەدەلدى حالىقارالىق جارىس. وندا قاتىسۋشىلار جەكە جانە كوماندالىق تۇردە بەينە مەن سۋرەت گەنەراسياسى، ماشينالىق وقىتۋ، تابيعي ءتىلدى وڭدەۋ، كومپيۋتەرلىك كورۋ جانە باسقا دا باعىتتارداعى جاساندى ينتەللەكتكە نەگىزدەلگەن شەشىمدەردى ازىرلەۋ بويىنشا تاپسىرمالاردى ورىندايدى.
بايقاۋ باعدارلاماسىنان بولەك، وليمپيادا اياسىندا الەمنىڭ جەتەكشى ساراپشىلارىنىڭ دارىستەرى، ەتيكالىق پىكىرتالاستار، مادەني جانە ءبىلىم بەرۋ ءىس-شارالارى ۇيىمداستىرىلادى. جارىستىڭ ماقساتى – جاستار اراسىندا جاساندى ينتەللەكتتى ناسيحاتتاۋ.
قازاقستان قۇراماسىنىڭ باس سەرىكتەسى Astana Hub حالىقارالىق يننوۆاسيالىق كلاستەرى اتاندى.
Astana Hub كوماندا دايىندىعىنا ەلەۋلى ۇلەس قوسىپ، ۇلتتىق قۇرامانىڭ الەمدىك ارەناداعى قاتىسۋىنا قولداۋ كورسەتتى جانە قازاقستاننىڭ جاساندى ينتەللەكت سالاسىنداعى جاڭا ورتالىق رەتىندە بەدەلىن نىعايتتى.
قازاقستان قۇراماسىنىڭ وليمپياداعا قاتىسۋىن ۇيىمداستىرۋشى - قازاقستاننىڭ سپورتتىق باعدارلامالاۋ فەدەراسياسى (CPFED). فەدەراسيانىڭ ماقساتى - حالىق اراسىندا سپورتتىق باعدارلامالاۋدى ناسيحاتتاۋ جانە دامىتۋ، سونداي-اق قازاقستاندىق قاتىسۋشىلاردىڭ رەسپۋبليكالىق جانە حالىقارالىق جارىستارداعى ناتيجەلەرىن ارتتىرۋ.
قاتىسۋشىلاردى ىرىكتەۋ مەن دايىنداۋدان باستاپ ساپاردى ۇيىمداستىرۋعا دەيىنگى جان-جاقتى قولداۋدىڭ ارقاسىندا CPFED ۇلتتىق قۇرامانىڭ ساپالى دايىندالۋىن قامتاماسىز ەتتى. بۇل - ولاردىڭ ءساتتى ونەر كورسەتۋىنە ىقپال ەتكەن نەگىزگى فاكتورلاردىڭ ءبىرى بولدى.
قازاقستان قۇراماسىنىڭ بۇل جەتىستىگى ITء-بىلىم بەرۋدىڭ جوعارى دەڭگەيىن جانە وقۋشىلاردىڭ وزىق تەحنولوگيالارعا دەگەن قىزىعۋشىلىعىن دالەلدەيدى. IOAI 2025 وليمپياداسىنداعى جەڭىس – بۇل تالىمگەرلەردىڭ جۇيەلى ەڭبەگىنىڭ، ءبىلىم بەرۋ باستامالارىن قولداۋدىڭ جانە جاساندى ينتەللەكتتىڭ بولاشاعىن بۇگىننەن باستاپ قالىپتاستىرۋعا دايىن جاس ماماندار قاتارىن ارتتىرۋدىڭ ناتيجەسى بولىپ وتىر.
مينيسترلىك وليمپياداعا قاتىسۋ بارىسىندا قولداۋ كورسەتكەن بارلىق جاندارعا شىن جۇرەكتەن العىس بىلدىرەدى. بۇل ناتيجە سپورتتىق باعدارلامالاۋ فەدەراسياسى @cpfed.kz، Astana Hub، سونداي-اق اتا-انالار مەن ۇستازداردىڭ قولداۋىنىڭ ارقاسىندا مۇمكىن بولدى.
