Qazaqstan IIM adamdardy esirtki jelisine tartýdyń halyqaralyq arnasyn joidy. Bir jyldan astam ýaqytqa sozylǵan aýqymdy arnaiy operatsiia birneshe memlekettiń aýmaǵyn qamtydy, dep habarlaidy dalanews.kz.
Operatsiia Ýkraina jáne Albaniianyń quqyq qorǵaý organdarymen, Qazaqstan men Ýkrainanyń bas prokýratýralarymen, Interpol jáne AQSh-tyń Esirtkige qarsy kúres basqarmasymen birlesip júrgizildi. Qylmyskerler zańdy jumysqa ornalastyrýdy jeleý etip, call-ortalyq operatorlaryn, HR-menedjerlerdi, himikterdi, kýrerlerdi, esirtki jasyrýshylardy, logister men qoima qyzmetkerlerin tartqan. Adamdarǵa ońai tabys tabýdy ýáde etip, is júzinde olardy halyqaralyq esirtki biznesine aralastyrǵan.
- Qylmystyq qurylymda rólder naqty bólingen. Ony kórshiles memlekettiń 36 jastaǵy azamaty uiymdastyrǵan. Qazaqstannyń Ishki ister ministrligi operatsiianyń barlyq negizgi kezeńderine qatysty, - dedi QR IIM esirtki qylmysyna qarsy is-qimyl komiteti tóraǵasynyń orynbasary Qýandyq Áljanov.
Qylmystyq áreketti qujattaý barysynda Ýkrainada adamdardy zańsyz áreketke tartýmen ainalysqan call-ortalyqtarda 26 tintý júrgizilip, tórt myńǵa jýyq tsifrlyq aiǵaqtar tárkilendi. Olardy taldaý nátijesinde Telegram jelisindegi 31 esirtki dúkeni, qylmystyq shemany uiymdastyrýshylar jáne onda tartylǵan júzdegen adam anyqtaldy. Olardyń Qazaqstan aýmaǵynda esirtki taratýǵa qatysy bar-joǵyn IIM qyzmetkerleri tekserdi.
Mamyr aiynda operatsiianyń kezekti belsendi kezeńi ótti. Qazaqstan IIM ókilderiniń qatysýymen Kiev qalasy men Kiev oblysynda 70 tintý júrgizilip, adamdardy qylmysqa tartýmen ainalysqan call-ortalyqtardyń qyzmeti toqtatyldy jáne qylmystyq qoǵamdastyqtyń 27 belsendi múshesi anyqtaldy. Shilde aiynda Qazaqstan aýmaǵynda ýkrainalyq quqyq qorǵaý organdary ókilderiniń qatysýymen taǵy 15 tintý júrgizildi. Elimizde esirtki satýǵa qatysy bar jeli músheleri ustaldy.
- Qylmystyq qurylym ishinde qatań erejeler bolǵan. Qylmystyq áreketten bas tartýǵa tyrysqan adamdarǵa aiyppul salynǵan, olardy uryp-soǵyp, zańsyz ustap otyrǵan. Tartymdy kórinetin bos jumys oryndarynyń artynda adamdy esirtki biznesine tartý turǵan. Al adam bul iske kirgennen keiin odan shyǵýǵa múmkindik bermegen, - dedi QR IIM esirtki qylmysyna qarsy is-qimyl komiteti tóraǵasynyń orynbasary Qýandyq Áljanov.
Operatsiianyń qorytyndy kezeńinde Ýkrainanyń bes oblysy men Kiev qalasynda taǵy 35 tintý júrgizildi. Azamattardy qylmysqa tartýmen ainalysqan halyqaralyq jeliniń eki býyny joiyldy. Quramynda sintetikalyq esirtki bar 24 keli qospa, 3,5 myńnan astam qoldan jasalǵan shylym jáne ólshep salynǵan eki myńǵa jýyq paket tárkilendi. Jeti adam ustalyp, qylmystyq shemaǵa qatysqan toǵyz adamǵa aiyp taǵyldy.
- Bul sandardyń artynda taralmaǵan myńdaǵan esirtki dozasy tur. Bul adamdardyń densaýlyǵyn saqtap qalý, otbasylardy esirtkige táýeldilikten qorǵaý jáne azamattardy qylmystyq bizneske tartylýdan aman alyp qalý degen sóz. Halyqaralyq jelini uiymdastyrýshylar men onyń barlyq qatysýshylaryn anyqtaý boiynsha jumys jalǵasýda, - dedi spiker.
IIM azamattardy internettegi ońai tabys týraly usynystarǵa senbeýge shaqyrady. Tartymdy usynystardyń artynda halyqaralyq esirtki jelisi turýy múmkin.
