Qazaqstannyń birqatar fýtbol klýbtary tóreshilik júiedegi ádiletsizdikke bailanysty Qazaqstan fýtbol federatsiiasynyń prezidenti Marat Omarov atyna ujymdyq úndeý joldady, dep habarlaidy dalanews.kz.
Málimdemege 15 klýbtyń basshylyǵy qol qoiǵan. Olardyń qatarynda Astana, Atyraý, Altai, Elimai, Jetisý, Jeńis, Ertis, Kaspii, Qaisar, Qyzyljar, Ordabasy, Tobyl, Ulytaý, Turan jáne Taraz bar. Al Aqtóbe, Qairat jáne Oqjetpes úndeýge qosylmaǵan.
Klýb ókilderi chempionattaǵy tóreshilik máselesine qatysty alańdaýshylyqtaryn ashyq jetkizgen. Úndeýde maýsym boiy tóreshilerdiń júieli ári qaitalanatyn qatelikteri kezdesip jatqany, olardyń match nátijesine jáne týrnir kestesine tikelei áser etetini aitylǵan.
«Bul endi jekelegen epizodtar máselesi emes — bul tóreshilikke degen senim daǵdarysy», – delingen ujymdyq hatta.
Fýtbol klýbtary birneshe negizgi máselege nazar aýdarǵan. Atap aitqanda:
- tóreshiler jumysyn baǵalaýdyń ashyq júiesiniń bolmaýy;
- match nátijesine áser etken óreskel qatelikterdiń eskerýsiz qalýy;
- klýbtarmen bailanystyń joqtyǵy;
- jalpy tóreshilik institýtyna degen senimniń tómendeýi.
Klýb ókilderi fýtbolǵa úlken investitsiia quiylatynyn atap ótti. Olardyń aitýynsha, match taǵdyryn oiyn emes, túsiniksiz ári daýly sheshimder anyqtai bastasa, bul sporttyq ádilettilikke úlken soqqy bolady.
Úndeý avtorlary eń aldymen Nýný Kashtrý qyzmetinen ketýin talap etti.
Sonymen qatar klýbtar tóreshiler korpýsynyń jumysyna táýelsiz tekserý júrgizýdi jáne arbitrlerdi taǵaiyndaý men baǵalaý protsesiniń ashyq bolýyn surady.
