Semserlesýden Qazaqstan erler quramasy komandalyq jarysta toǵyz dúrkin Olimpiada chempionyn jeńip, álem chempionatynda tarihi qola medal ielendi, – dep habarlaidy Dalanews.kz.
Búgin semserlesýden ulttyq qurama Tbiliside ótip jatqan álem chempionatynda tarihi jetistikke qol jetkizdi. Bizdiń qurama alǵash ret jartylai finalǵa shyǵyp, qazirgi álem chempiony — Italiia quramasyn jeńdi.
Kirill Prohodov, Rýslan Qurbanov, Vadim Sharlaimov jáne Elmir Álimjanov final joldamasy úshin Tokio Olimpiadasynyń chempiony, Parij Olimpiadasynyń kúmis júldegeri Japoniia sportshylarymen sheberlik baiqasyp, qarsylastaryna az ǵana basymdyqpen jol berip qoidy.
Qola júlde úshin ótken tartysty kezdesýde otandyq sportshylar toǵyz márte Olimpiada chempiony atanǵan Frantsiia quramasymen baq synasyp, álem chempionatynyń qola júldesin jeńip aldy.
Memleket basshysynyń otandyq sportqa sheteldik mamandardy tartý jónindegi tapsyrmasyn iske asyrý aiasynda osy jyldan bastap semserlesýden erler jáne áielder arasyndaǵy ulttyq quramalarda bedeldi bapkerler men keńesshiler jumys istei bastady. Týrizm jáne sport ministrligi otandyq sportqa halyqaralyq tájiribeni engizý, el sportshylarynyń biliktiligin arttyrý, júlde kórsetkishin jaqsartý jáne sport salasyn damytý baǵytyndaǵy memlekettik saiasatty iske asyrý boiynsha júieli jumysty jalǵastyryp keledi.
