Qazaqstan Horizon Europe baǵdarlamasyna qaýymdastyrylǵan el mártebesinde qosylý múmkindigin qarastyryp jatyr. Bul týraly Ǵylym jáne joǵary bilim ministri Saiasat Nurbek Eýropalyq odaq ókilderimen kezdesý barysynda málimdedi, dep habarlaidy dalanews.kz.
Horizon Europe – ǵylym men innovatsiiany qoldaýǵa arnalǵan Eýropalyq odaqtyń eń iri baǵdarlamalarynyń biri. Onyń jalpy biýdjeti 175 mlrd eýrony quraidy. Baǵdarlamaǵa qatysý qazaqstandyq joǵary oqý oryndary men ǵylymi-zertteý institýttaryna halyqaralyq granttarǵa qol jetkizýge múmkindik beredi.
Saiasat Nurbektiń aitýynsha, Qazaqstan baǵdarlamanyń tolyqqandy qatysýshysy bolýdy maqsat etip otyr.
«Bizdiń maqsatymyz – Horizon Europe ǵylymi qarjylandyrý baǵdarlamasyna tolyqqandy qatysýshy retinde qosylý. Bul ońai protsess emes. Qazirgi tańda baǵdarlamaǵa Eýropalyq odaqqa múshe emes Japoniia, Ońtústik Koreia jáne Avstraliia siiaqty iri memleketter ǵana qatysady. Sondyqtan biz bul baǵyttaǵy daiyndyq jumystaryn bastap kettik», – dedi ministr.
Onyń sózinshe, Eýropalyq komissiianyń úsh qurylymy Qazaqstannyń bastamasyna qoldaý bildirgen.
Kezdesý barysynda ǵylym men joǵary bilim salasyndaǵy áriptestikti keńeitý máseleleri de talqylandy. Sondai-aq Briýssel diplomatiialyq akademiiasymen yntymaqtastyq jáne qazaqstandyq diplomattardy daiarlaý baǵytyndaǵy ózara jumys sóz boldy.
Briýssel diplomatiialyq akademiiasynyń direktory Gýnter Habblom Qazaqstannyń aimaqtaǵy strategiialyq róline toqtaldy.
«Biz Qazaqstannyń diplomatiialyq korpýsyn daiarlaý máselesin talqyladyq. Briýssel diplomatiialyq akademiiasy álemdegi eń myqty baǵdarlamalardyń birine ie jáne tájiribege erekshe mán beredi. Sonymen qatar Ortalyq Aziiany zertteý baǵytyn damytqymyz keledi. Bul rette Qazaqstan óńirdegi mańyzdy memleket retinde basty nazarda bolady», – dedi ol.
Mamandardyń pikirinshe, Horizon Europe baǵdarlamasyna qosylý otandyq ǵylymnyń halyqaralyq ǵylymi jobalarǵa qatysý múmkindigin keńeitip, qazaqstandyq zertteýshilerdiń álemdik ǵylymi qaýymdastyqpen bailanysyn nyǵaitýǵa jol ashady.
