Qarjy monitoringi agenttigi (QMA) 2025 jyldyń qańtarynan qyrkúiegine deiin Qazaqstan aýmaǵynda 130 kriptovaliýta birjasyn japty, dep habarlaidy Dalanews.kz.
Agenttik tóraǵasynyń orynbasary Qairat Bijanovtyń aitýynsha, bilik tsifrlyq aktivter túrinde 9,2 milliard teńge (shamamen 17 million dollar) kólemindegi múlikti tárkilegen.
"Jabylǵan kriptoplatformalar zańsyz jumys istegen jáne qylmystyq jolmen alynǵan tabysty jylystatý arnalary retinde paidalanylýy múmkin edi. Olar Astana halyqaralyq qarjy ortalyǵynyń Qarjylyq qyzmetter agenttigi (AFSA) bergen litsenziiasyz qyzmet kórsetken. Bul – “Tsifrlyq aktivter týraly” zańǵa qaishy", – dedi Bijanov.
Onyń sózinshe, kriptovaliýtanyń kóleńkeli ainalymy el ekonomikasy úshin úlken qaýip tóndiredi, óitkeni ol aqshany zańsyz ainalymǵa túsirýge jáne elden shyǵarýǵa yqpal etedi.
"Qabyldanyp jatqan sharalarǵa qaramastan, qolma-qol aqsha shyǵarý kólemi ósip keledi. Negizgi qaýip – jiberýshi men alýshynyń jeke basyn anyqtamai, anonimdi tranzaktsiia jasaý múmkindigi. Mundai platformalar banktik kartalardy nominaldy ielerdiń atyna rásimdep, operatsiialardy zańdy mámile túrinde jasyrady", – dep túsindirdi QMA tóraǵasynyń orynbasary.
Buǵan deiin agenttik elde kriptovaliýta óndirýmen (mainingpen) zańsyz ainalysýǵa qatysty 17 qylmystyq is qozǵalǵanyn, al zańsyz mainingten kelgen jalpy zalal 1,3 milliard teńgege (2,3 million dollar) jetkenin habarlaǵan.
