Keiingi jyldary Qazaqstannan eńbek kóshi-qonynyń baǵyty ózgerip, joǵary bilikti mamandardyń bir bóligi Eýropa men Taiaý Shyǵys elderiniń ornyna Ózbekstandy tańdai bastaǵan. Bul úrdis, ásirese, tájiribeli ári qalyptasqan kásibi mamandar arasynda aiqyn baiqalady.
Qazaq Expert Club sarapshysy, kadrlyq damý salasynyń mamany Arman Shoqparov Ózbekstanda jumys isteitin 60-tan astam qazaqstandyq arasynda zertteý júrgizgen, dep habarlaidy Dalanews.kz.
Onyń aitýynsha, bul qatarǵa jas mamandar emes, 30–45 jas aralyǵyndaǵy, eńbek ótili 10–20 jyldan asatyn kásibi kadrlar kiredi.
"Bul – óz salasynda qalyptasqan, tájiribesi mol mamandar. Olar negizinen qarjy sektory, IT, telekom jáne halyqaralyq konsalting salalarynda eńbek etedi", - deidi Arman Shoqparov.
Sarapshynyń sózinshe, mundai mamandar kóbine jumysty ózderi izdemeidi. Kerisinshe, olardy ózbekstandyq jumys berýshiler arnaiy shaqyrady nemese halyqaralyq kompaniialar ishindegi aýysym arqyly qyzmetke tartady. Iaǵni, bilikti kadrlarǵa suranys joǵary.
Zertteý nátijesi kórsetkendei, relokatsiianyń basty sebepteriniń biri – qarjylai múmkindik. Mamandardyń jalaqysy orta eseppen 50–100 paiyzósse, keibiriniń tabysy eki eseden de joǵary.
Arman Shoqparovtyń aitýynsha, motivatsiia tek tabysqa bailanysty emes.
"Kópshiligi úshin kásibi ósý, iri jobalarǵa qatysý jáne halyqaralyq tájiribe jinaý mańyzdy", – dep atap ótti ol.
Alaida sarapshy bastapqy kútilimderdiń ýaqyt óte kele ózgeretinin de jasyrmaidy. Onyń pikirinshe, respondentter úshin basty shekteýlerdiń biri – biznes-ortanyń damý deńgeii.
"Qazaqstan tsifrlandyrý men korporativtik standarttardy engizý kezeńinen 8–10 jyl buryn ótken. Sondyqtan bizde basqarý júiesine qoiylatyn talap joǵary. Al Ózbekstanda bul baǵyt áli qalyptasý ústinde", – deidi ol.
Soǵan qaramastan, saýalnamaǵa qatysqandardyń tek úshten biri ǵana Qazaqstanǵa oralýdy josparlap otyr. Qalǵandary Ózbekstanda uzaq merzimge qalýdy nemese bul tájiribeni ózge elderge kóshýge múmkindik retinde qarastyrady.
Sarapshy muny el úshin mańyzdy másele dep baǵalaidy. Onyń sózinshe, bul – ýaqytsha emes, uzaqmerzimdi adami kapitaldyń syrtqa ketýi.
"Basqasha aitqanda, joǵary bilikti mamandar halyqaralyq eńbek naryǵyna beiimdelip, elge qaitýy qiyndai túsedi", - dep qosty ol.
Arman Shoqparovtyń pikirinshe, kadrlardyń syrtqa ketýi ishki naryqqa da áser etedi. Atap aitqanda, basqarýshy býyn álsirep, kompaniialardyń básekege qabilettiligi tómendeýi múmkin.
"Eger úrdis ózgermese, Qazaqstan basqarýshylyq quzyretter tapshylyǵyna tap bolyp, syrtqy mamandarǵa táýeldilik artýy múmkin", – dep eskertti.
