Qazaqstan baýyrlas túrik halqyna kómek kórsetýge ázir - Toqaev
Bul týraly Prezidenttiń baspasóz hatshysy Berik Ýáli Facebook -te jazdy.
Memleket basshysy Qasym-Jomart Toqaev Túrkiiada bolǵan alapat órt saldarynan eldiń ekonomikasy men týristik bazasyna orasan zor shyǵyn kelgenine jáne azamattardyń densaýlyǵyna aýyr zardabyn tigizgenine bailanysty Túrkiia Prezidenti Rejep Taiip Erdoǵanǵa niettestik bildirgen jedelhatyn joldady.
Qazaqstan Prezidenti óz jedelhatynda baýyrlas túrik halqyna gýmanitarlyq kómek kórsetýge daiyn ekenin atap ótip, Prezident Rejep Taiip Erdoǵanǵa eldegi tabiǵat apatyna qarsy kúreste sáttilik tiledi.
Aita ketsek, aptanyń basynda tutanǵan Túrkiianyń ońtústigindegi orman órti aýyzdyqtalmai jatyr. Qyzyl jalyn alty provintsiiaǵa qanat jaiǵan. Aldyn ala derekter boiynsha, alty adam kóz jumyp, 400-den asa adam zardap shekken.
