Qazaqstan Respýblikasy Kólik ministrliginiń Azamattyq aviatsiia komitetinde múmkindigi shekteýli azamattar men qozǵalysy shekteýli ózge de jolaýshylarǵa arnalǵan áýejai infraqurylymynyń qoljetimdiligi jáne qyzmet kórsetý sapasy máseleleri boiynsha jumys kezdesýi ótti, dep habarlaidy dalanews.kz.
Jiyn barysynda jolaýshynyń áýejaidaǵy tolyq marshrýty qarastyryldy. Atap aitqanda, avtoturaqtan bastap terminalǵa kirý, qajetti rásimderden ótý jáne áýejai ishindegi qyzmetterdi paidalaný kezeńderi talqylandy.
Kezdesýde arnaiy avtoturaq oryndary, qoljetimdi qozǵalys baǵyttary, pandýstar, kótergish platformalar, terminal ishinde kedergisiz júrip-turý múmkindigi máseleleri kóterildi. Sonymen qatar kórý jáne estý qabileti buzylǵan jolaýshylar úshin aqparattyń qoljetimdiligine erekshe nazar aýdaryldy.
Osy oraida taktildi baǵyttaǵyshtar, Brail qarpi, kórneki navigatsiia quraldary men indýktsiialyq júielerdi paidalaný máseleleri sóz boldy.
Budan bólek, jolaýshylardy súiemeldeý qyzmetteriniń jumysy jáne qyzmetkerlerdi erekshe qajettiligi bar azamattarǵa kómek kórsetýge daiyndaý deńgeii talqylandy.
Jiynnyń basty qorytyndysy retinde qoljetimdilik jekelegen infraqurylym nysandarymen ǵana emes, jolaýshy úshin áýejai aýmaǵynda túsinikti ári yńǵaily birtutas marshrýt retinde qamtamasyz etilýi tiis ekeni atap ótildi.
Kezdesý qorytyndysy boiynsha áýejailarǵa ártúrli sanattaǵy jolaýshylardyń qajettilikterin eskere otyryp, infraqurylymnyń jai-kúii men qoldanystaǵy qyzmet kórsetý rásimderine qosymsha baǵalaý júrgizý usynyldy.
