Qazaqstanda jýsan tozańyna allergiiany emdeýge arnalǵan otandyq preparattyń klinikalyq zertteýiniń ekinshi kezeńi bastaldy, dep habarlaidy dalanews.kz.
Densaýlyq saqtaý ministrliginiń málimetinshe, joba 2024–2026 jyldarǵa arnalǵan ǵylymi tehnikalyq baǵdarlama aiasynda júzege asyrylyp jatyr.
«Qazaqstan Respýblikasynyń Densaýlyq saqtaý ministrligi elimizde maýsymdyq allergiianyń eń keń taralǵan sebepteriniń biri sanalatyn jýsan tozańyna allergiiany emdeýge arnalǵan otandyq preparattyń II fazadaǵy klinikalyq zertteýin bastady. Jobanyń basty maqsaty — allergiiany emdeýdi patsientter úshin qoljetimdi ári yńǵaily etetin qazaqstandyq preparat ázirleý», – delingen habarlamada.
Mamandardyń aitýynsha, jýsan tozańyna allergiia Qazaqstandaǵy eń jii kezdesetin maýsymdyq allergiialyq reaktsiialardyń qataryna jatady.
Ásirese jaz jáne kúz mezgilderinde:
— murynnan sý aǵý,
— túshkirý,
— kózden jas aǵý,
— tynys alýdyń qiyndaýy siiaqty belgiler kúsheiedi.
Ministrlik jańa preparatty qazaqstandyq ǵalymdar zamanaýi rekombinantty allergen negizinde ázirlegenin málimdedi.
Preparat OtarBioPharm otandyq kásipornynda halyqaralyq GMP standarttaryna sáikes óndirilip jatyr.
«Ázirlemeniń basty artyqshylyqtarynyń biri — emdeý kýrsynyń qysqalyǵy. Dástúrli allergen spetsifikalyq terapiia uzaq ýaqytqa sozylýy múmkin bolsa, jańa preparat aptasyna bir ret jasalatyn tórt teriasty inektsiiasynan ǵana turady», – dep habarlady vedomstvo.
Buǵan deiin eriktilerdiń qatysýymen klinikalyq zertteýdiń birinshi kezeńi sátti aiaqtalǵan.
Zertteýshilerdiń málimetinshe, synaq barysynda aýyr janama áserler anyqtalmaǵan, al aldyn ala nátijeler allergenge sezimtaldyqtyń tómendegenin kórsetken.
2026 jylǵy 24 sáýirde Densaýlyq saqtaý ministrligi zertteýdiń ekinshi kezeńin ótkizýge resmi ruqsat bergen.
Klinikalyq synaq «Rahat» meditsinalyq ortalyǵy bazasynda júrgiziledi. Oǵan jýsan tozańyna allergiiasy rastalǵan 138 patsient qatysady.
