Qazaqstandyq jolaýshy Qatar Airways kompaniiasynyń qyzmetkerin memlekettik tilde qyzmet kórsetýden bas tartty dep aiyptady. Onyń sózinshe, Sietlden Almatyǵa kelgen kezde balalaryna arnalǵan eki býster tegin tasymaldanǵan. Alaida keri reiske tirkelý barysynda áýe kompaniiasynyń ókili sol býsterlerdi ushaqqa ótkizý úshin 500 dollar tóleýdi talap etken. Jolaýshy bul talaptyń sebebin qazaq tilinde túsindirýdi suraǵan kezde, qyzmetker politsiia shaqyrǵan, dep habarlaidy dalanews.kz.
Áleýmettik jelide oqiǵanyń mán-jaiyn baiandaǵan Áigerim Imanbaeva 18 maýsymda balalarymen birge Sietl – Doha – Almaty baǵyty boiynsha ushqan. Onyń sózinshe, sol kezde eki balanyń býsterin tasymaldaýǵa bailanysty eshqandai másele týyndamaǵan jáne qosymsha aqy alynbaǵan.
Alaida 20 tamyzda Almaty áýejaiynan keri baǵyttaǵy reiske tirkelý kezinde jaǵdai kúrt ózgergen. Jolaýshynyń aitýynsha, áýe kompaniiasynyń menedjeri Ilia ár býster úshin shamamen 250 dollardan, jalpy 500 dollar kóleminde aqy tóleýdi talap etken. Tólem jasalmaǵan jaǵdaida zattardy reiske tirkeýden bas tartqan.
Jolaýshy buǵan deiin dál osy júkpen esh kedergisiz ushqanyn aityp, talaptyń sebebin túsindirýdi suraǵan. Alaida kompaniia ókili naqty negiz keltirmegenin aitady.
"Kómekke kelgen menedjerge qazaq tilinde sóilegenimde, ol “oryssha” dep, memlekettik tilde qyzmet kórsetýden bas tartty. Qazaqstanda qazaq tilinde sóileý – meniń zańdy quqyǵym ekenin eskerttim", – deidi Áigerim Imanbaeva.
Onyń málimdeýinshe, menedjer jolaýshynyń talabyna jaýap berýdiń ornyna politsiia shaqyrǵan. Oqiǵa ornyna kelgen politsiia qyzmetkeri de daýdy sheshe almaǵan. Nátijesinde áiel óz eliniń áýejaiynda halyqaralyq kompaniianyń qyzmetkerimen aǵylshyn tilinde sóilesýge májbúr bolǵanyn aitady.
Imanbaeva qolynda óziniń sabyrly ári mádenietti sóileskenin kórsetetin beinejazba bar ekenin jetkizdi. Soǵan qaramastan, menedjer ony "tártipsizdik tanytty" dep aiyptaǵan.
"Qazaqstanda ana tilimde qyzmet kórsetýdi suraǵanym úshin ústimnen politsiia shaqyryldy. Bul – tutynýshyǵa qurmetsizdik qana emes, tildik belgisi boiynsha kemsitý dep esepteimin", - dedi jolaýshy.
Kompaniia basshylyǵy keshirim suraýmen shektelgen
Oqiǵadan keiin Áigerim Imanbaeva Qatar Airways kompaniiasyna resmi shaǵym túsirgen. Ótinish CAS-921182-M1F1L2 nómirimen tirkelgen.
Áýe kompaniiasy joldaǵan jaýap hatta qyzmetkerlerdiń áreketi men qyzmet kórsetý sapasyna qatysty shaǵymnyń qabyldanǵany kórsetilgen. Qatar Airways barlyq jolaýshyǵa ulty men etnikalyq tegine qaramastan teń qaraitynyn málimdep, keltirilgen qolaisyzdyq úshin keshirim suraǵan.
Sondai-aq kompaniia jolaýshynyń shaǵymy jerústi qyzmetteri basshylyǵyna jetkizilgenin jáne qyzmet kórsetý deńgeiin saqtaý úshin tiisti sharalar qabyldanatynyn habarlaǵan. Alaida naqty qai qyzmetkerdiń áreketi tekseriletini jáne oǵan qandai shara qoldanylatyny aitylmaǵan.
Jolaýshy muny máseleniń mánine jaýap bermeitin qalypty úlgidegi hat dep baǵalady.
"Olar naqty shara qoldanýdyń ornyna, “barlyq tutynýshyǵa birdei qaraimyz” degen mazmundaǵy standartty keshirim jiberdi", - deidi ol.
Reis toqtatylyp, jolaýshy qosymsha shyǵynǵa batqan
Áigerim Imanbaevanyń aitýynsha, daýdan keiin áýe kompaniiasy otbasy aldyn ala satyp alǵan reisti toqtatqan. Sonyń saldarynan olar Dohadaǵy qonaqúi aqysyn óz qarajatynan tóleýge májbúr bolǵan. Kompaniia bul shyǵyndardy ótemegen.
Osylaisha balalarǵa arnalǵan eki býsterdi tirkeýden bastalǵan másele jolaýshynyń politsiiamen betpe-bet kelýine, reisten qaǵylýyna jáne qosymsha qarjylai shyǵynǵa ushyraýyna ákelgen.
Áiel Qatar Airways kompaniiasynan bolǵan jaǵdaiǵa resmi ári naqty túsinikteme berýdi, menedjerdiń áreketine baǵa berýdi jáne qyzmetkerlerine Qazaqstan zańdary men memlekettik tilge qurmetpen qaraýdy úiretýdi talap etti.
Aita keteiik, ázirge oqiǵaǵa qatysty áýe kompaniiasynyń egjei-tegjeili túsiniktemesi men Almaty áýejaiy politsiiasynyń ustanymy jariialanǵan joq.
