«Qazaqmys korporatsiiasy» JShS Basqarma tóraǵasy Rýslan Óskenáli jumys sapary barysynda Jezqazǵandaǵy birqatar áleýmettik mańyzy bar nysandardy aralap, olardyń iske asyrylý barysymen tanysty, dep habarlaidy dalanews.kz.
Baǵdarlamanyń negizgi tarmaqtarynyń biri – «NAMYS» balalar men jasóspirimder sport akademiiasy boldy. Quny 8,1 mlrd teńgeni quraityn joba 5 myń sharshy metrden astam aýmaqta 150-200 tárbielenýshige arnalǵan zamanaýi sport keshenin salýdy kózdeidi. Munda Ulytaý oblysynyń qalalary men aýdandarynan kelgen balalar úshin sapaly bilim berý men kásibi sporttyq daiarlyqty ushtastyrýǵa jaǵdai jasalady.
«NAMYS» SK» qory Jezqazǵan óńirinde 2019 jyldan beri jumys istep keledi. Osy ýaqyt ishinde onyń úiirmelerinde 3 myńnan astam bala sportpen shuǵyldandy. Al búginde 700-den astam jas sportshy turaqty túrde ártúrli sport túrimen ainalysady. Akademiianyń ashylýy biyl qyrkúiek aiyna josparlanǵan.
Sonymen qatar Rýslan Óskenáli Keńgir sý qoimasy boiyndaǵy jaǵalaý qurylysy jobasymen tanysty. Quny shamamen 3,4 mlrd teńge bolatyn jańa qoǵamdyq nysannyń ekinshi kezeńi Ulytaý oblysy ákimdigi men «Qazaqmys korporatsiiasy» JShS arasyndaǵy memorandým aiasynda iske asyrylýda. Oblystyq meshitpen birge bul jaǵalaý demalys, serýendeý jáne mádeni is-sharalar ótkizýge arnalǵan zamanaýi qoǵamdyq keńistikti qalyptastyrady.
Nysandardy aralaý qorytyndysy boiynsha Rýslan Óskenáli óńirdiń damýy men halyqtyń ómir súrý sapasyn arttyrýǵa baǵyttalǵan barlyq jobalardyń sapaly jáne belgilengen merzimde oryndalýynyń mańyzyn atap ótti.
«Qazaqmys» korporatsiiasynda áleýmettik mindettemelerdi oryndaý jáne ózine qatysy bar óńirlerdi damytý kompaniianyń negizgi basymdyqtarynyń biri bolyp qala beretini atap ótildi. Óndiristik jobalarmen qatar kompaniia sport, mádeniet, bilim berý jáne qoǵamdyq infraqurylym nysandaryn salýǵa júieli túrde investitsiia quiyp, Ulytaý oblysynyń turaqty damýyna úles qosýda.
