«Qazaqmys» Toby Balqash jáne Jezqazǵan mys balqytý zaýyttaryn ekologiialyq jańǵyrtý baǵdarlamasyn júzege asyrýda. Jumys kásiporyndar 2025 jylǵy jeltoqsanda alǵan Keshendi ekologiialyq ruqsat aiasynda júrgizilip, óndiristi 2034 jylǵa deiin kezeń-kezeńimen jańǵyrtýdy kózdeidi, dep habarlaidy dalanews.kz.
Eki óndiristik alań boiynsha ekologiialyq investitsiianyń jalpy kólemi 829,6 mlrd teńgeni quraidy. Onyń 511,6 mlrd teńgesin Jezqazǵan mys balqytý zaýytyn jańǵyrtýǵa, al 318 mlrd teńgesin Balqash mys balqytý zaýytyna baǵyttaý josparlanǵan.
Jańǵyrtý jumysy aiaqtalǵannan keiin kúkirt dioksidi shyǵaryndylary jylyna 70 myń tonnadan astamǵa azaiady dep kútilýde. Lastaýshy zattardyń jiyntyq shyǵaryndylary 70%-ǵa deiin qysqarady, beiorganikalyq shań shyǵaryndylary 99,6%-ǵa tómendeidi, sáikesinshe óndiriletin ónimniń kómirtek izi de edáýir azaiady.
Quny shamamen 200 mln AQSh dollaryn quraityn Jezqazǵan mys balqytý zaýytynda jańa kúkirt qyshqyly tsehynyń qurylysy baǵdarlamanyń negizgi jobasy bolmaq. Zamanaýi Single Contact Single Absorption tehnologiiasyn engizý kúkirt dioksidi shyǵaryndylaryn eki eseden astam qysqartýǵa jáne óndiristiń ekologiialyq talapqa sáikestigin qamtamasyz etýge múmkindik beredi.
Ekologiialyq jańǵyrtý baǵdarlamasy jańa kúkirt qyshqyly tsehynyń qurylysymen qatar gazdan tazartý júiesin jańartýdy, óndiristi gazǵa kóshirýdi, energiia tiimdiligin arttyrýdy jáne jańartylatyn energiia kózderin paidalanýdy kózdeidi. Bul baǵyttardyń barlyǵy ozyq qoljetimdi tehnologiialarǵa, ESG qaǵidattaryna jáne óndiristik úderisti tsifrlyq baqylaýǵa negizdelgen ekologiialyq táýekelderdi basqarýdyń uzaq merzimdi júiesine biriktirilgen.
Óndiristiń kómirtek izin azaitý baǵytynda júzege asyrylǵan jobalardy da erekshe atap ótken jón. Atap aitqanda, gazdandyrý jobasy aiasynda Jezqazǵan mys balqytý zaýytynda, «Kazkat» zaýytynda jáne Jezqazǵan baiytý fabrikalarynyń súzgileý-keptirý bólimshelerinde jalpy sany 20 óndiristik nysan paidalanýǵa berilip, negizgi tehnologiialyq jabdyq mazýttan gazǵa kóshirildi. Nátijesinde Jezqazǵan mys balqytý zaýytynda parniktik gaz shyǵaryndylary aitarlyqtai qysqardy. Jobanyń jalpy quny shamamen 4 mln AQSh dollaryn qurady.
ESG tájiribesin iske asyrý aiasynda kompaniiada energiiany únemdeý jáne energiia tiimdiligin arttyrýdyń bekitilgen baǵdarlamasy jetildirilýde. Osy baǵyt boiynsha sapa menedjmenti júiesi de tabysty jumys isteidi.
Sonymen qatar kompaniiada 2035 jylǵa deiingi ekologiiany damytý jáne kompaniialar tobyn kómirteksizdendirý baǵdarlamasy ázirlenýde.
Óndiristiń qorshaǵan ortaǵa túsiretin áserin azaitý «Qazaqmys» Toby jumysynyń basym baǵyttarynyń biri bolyp qala beredi. Kompaniia ekologiialyq jańǵyrtýdy óndiristik alańdardy uzaq merzimdi damytýdyń mańyzdy bóligi retinde qarastyrady. Osy maqsatta óndiristik aktivterdi kezeń-kezeńimen jańartyp, ozyq qoljetimdi tehnologiialardy engizýde, sondai-aq energiia tiimdiligin arttyryp, ekologiialyq baqylaýdyń tsifrlyq júiesin damytyp jatyr. Bul sharalar shyǵaryndylar kólemin qysqartýǵa, óndiristiń kómirtek izin azaitýǵa jáne kompaniia qyzmet atqaratyn óńirlerdegi óndiristik úderistiń senimdiligin arttyrýǵa baǵyttalǵan.
