«Qazaqmys korporatsiiasy» JShS kásiporyndardyń óndiristik jáne áleýmettik-turmystyq infraqurylymyn jańartý baǵdarlamasyn júzege asyrýdy jalǵastyrýda. Baǵdarlamanyń kezekti kezeńinde kompaniianyń birqatar óndiristik nysandarynda kúrdeli jáne aǵymdaǵy jóndeý jumysy bastaldy. Baǵdarlamaǵa ákimshilik-turmystyq keshender, jataqhanalar, ashanalar, meditsinalyq pýnktter, jýynatyn bólmeler jáne jumyskerler kúndelikti paidalanatyn ózge de nysandar endi, dep habarlaidy dalanews.kz.
Jańa kezeńniń eń iri nysandarynyń biri – «Nurqazǵan» kenishi. Munda bir mezgilde birneshe ǵimaratta kúrdeli jóndeý jumysy júrgizilýde. Ákimshilik-turmystyq keshenderdiń qasbeti jańartylyp, ǵimarattardy jylytý jumysy atqarylýda, sondai-aq jýynatyn jáne qyzmettik úi-jailar qaita jańǵyrtylýda. Jobaǵa salynǵan investitsiianyń jalpy kólemi 113,4 mln teńgeden asady.
Sondai-aq Nurqazǵan, Qaraǵaily jáne Balqash baiytý fabrikalary men Balqash Tau-Ken Öndirisifilialynyń bólimshelerinde de aýqymdy jóndeý jumysy bastaldy. Munda ákimshilik-turmystyq keshender, jýynatyn bólmeler, injenerlik jeliler men ǵimarattardyń shatyry jańartylyp, ishki árleý jumysy júrgizilýde. Bul maqsatqa 367 mln teńgeden astam qarajat bólindi.
«Saiaq» kenishinde ákimshilik-turmystyq keshenderge, jýynatyn bólmeler men ǵimarattardyń qasbetine kúrdeli jóndeý júrgizilip, irgeles aýmaq abattandyrylýda. Budan bólek №17 «Tastaý» ashanasyna kúrdeli jóndeý júrgizý josparlanǵan. Bul jobalardy iske asyrýǵa 187,2 mln teńgeden astam qarajat qarastyrylǵan.
«Shatyrkól» kenishinde jóndeý jumysy injenerlik-tehnikalyq qyzmetkerlerge arnalǵan jataqhanany, qonaqúidi, meditsinalyq pýnkt pen kir jýatyn ǵimaratty qamtydy. Sonymen qatar №2 portaldaǵy sheberler bólmesi men tamaqtaný bólmesinde aǵymdaǵy jóndeý jumysy aiaqtalýǵa jaqyn qaldy. Jobany iske asyrýǵa 31 mln teńgeden astam qarajat jumsaldy.
Biyl baǵdarlama aiasynda jalpy quny 2,4 mlrd teńgeni quraityn áleýmettik-turmystyq maqsattaǵy 80-nen astam nysan jańartylady. Olardyń kópshiligi uzaq jyldar paidalanylǵannan keiin alǵash ret kúrdeli jóndeýden ótýde.
Baǵdarlama ǵimarattardy jańaryp qana qoimai, jumyskerler úshin zaman talabyna sai jaǵdai jasaýǵa baǵyttalǵan. Áleýmettik-turmystyq infraqurylymdy kezeń-kezeńimen jańǵyrtý nysandardyń senimdi jumys isteýin qamtamasyz etip, personalǵa eńbek etýge jáne demalýǵa jaily jaǵdai jasaýǵa, sondai-aq óndiristik alańdardy qaýipsizdik pen jailylyqqa qoiylatyn zamanaýi talapqa sáikestendirýge múmkindik beredi.
