Ulytaý oblysynda «Qazaqmys» korporatsiiasyna qarasty «Jomart» kenishinde jeti kenshiniń qaza bolýyna bailanysty qozǵalǵan qylmystyq is sotta qarala bastaidy, dep habarlaidy dalanews.kz.
Is Jańaarqa aýdandyq sotynda sýdia Nazarbek Kúzenbaevtyń tóraǵalyǵymen qaralady. Alǵashqy sot otyrysy 3 shildege belgilengen.
Aiyptalýshylar oryndyǵynda kásiporynnyń úsh qyzmetkeri otyr. Olar Qylmystyq kodekstiń 277-baby 3-bóligi boiynsha, iaǵni taý-ken jumystaryn júrgizý kezinde qaýipsizdik talaptaryn buzyp, abaisyzda eki nemese odan da kóp adamnyń ólimine ákep soqtyrdy degen aiyppen sotqa tartylyp otyr.
Eske salaiyq, qaiǵyly oqiǵa 17 aqpanda Ulytaý oblysyndaǵy «Jomart» kenishinde boldy. Ken ornynda opyrylý saldarynan jeti jumysshymen bailanys úzilgen. Kelesi kúni olardyń barlyǵynyń máiiti tabyldy.
Keiin Úkimettik komissiia apattyń negizgi sebebi retinde taý jynystaryndaǵy tektonikalyq jaryqtardan bólingen metan gazynyń jinalyp, jarylystan qorǵalmaǵan elektr jabdyǵynan shyqqan ushqynnyń áserinen tutanǵanyn atady.
Sondai-aq komissiia jeldetý júiesiniń jetkiliksiz jumys istegenin, shahtadaǵy metan deńgeiine baqylaýdyń ýaqytyly júrgizilmegenin jáne jaýapty tulǵalar tarapynan óndiristik qaýipsizdikke tiisti baqylaý bolmaǵanyn anyqtady.
Buǵan deiin Premer-ministr Oljas Bektenov depýtattardyń saýalyna bergen jaýabynda «Jomart» kenishindegi apatqa jumys berýshi 100 paiyz kináli ekenin málimdegen bolatyn.
Qaiǵyly oqiǵadan keiin ishki ister organdary qylmystyq is qozǵap, tergeý júrgizdi. Sonymen qatar Prezident Qasym-Jomart Toqaev kenshilerdiń qazasyna bailanysty kóńil aityp, óndiristik qaýipsizdik máselesin qatań synǵa alǵan edi.
