Jezqazǵanda korporasıanyń Basqarma basshysy Rýslan Óskenáliniń tóraǵalyǵymen kompanıa basshylyǵy jáne kásiporyndardaǵy eńbek ujymynyń qatysýymen jumys jınalysy ótti. Kezdesý barysynda Qazaqmystyń 2026 jylǵa arnalǵan negizgi damý baǵyttary aıqyndaldy. Ár baǵyt boıynsha naqty aqparatty Basqarma tóraǵasynyń tıisti bloktarǵa jaýapty orynbasarlary baıandady, dep habarlaıdy Dalanews.kz.
Kompanıanyń basym baǵyty sanalatyn óndiristik qaýipsizdik mádenıetin damytý kezdesýdiń basty taqyryby boldy. Jumyskerlerge adamnyń ómiri men densaýlyǵyna, sondaı-aq jabdyqqa qaýip tóndiretin jaǵdaı anyqtalǵan kezde, eńbekti qorǵaý talaptary buzylǵanda nemese eńbek jaǵdaıynyń qaýipsizdigi qamtamasyz etilmegeni anyqtalǵanda jumysty toqtatý quqy bar ekeni eskertildi.
2026 jylǵa arnalǵan óndiristik qaýipsizdikti damytýdyń negizgi baǵyttary belgilendi: qaýipsizdikke ınvestısıa salý, arnaıy kıimniń biryńǵaı standartyn engizý, komýnıkasıalyq jáne yntalandyrý baǵdarlamalaryn damytý, oqytýdy jetildirý, medısınalyq tekserýdi avtomattandyrý jáne rásimderdi standarttaý.
Mıneraldyq-shıkizattyq bazany damytý men geologıalyq barlaýǵa erekshe nazar aýdaryldy. 2025 jyly Micromine kompanıasy Micromine O&B baǵdarlamalyq jasaqtamasyn qoldana otyryp, bes kenishte geologıalyq-marksheıderlik jumysqa aýdıt júrgizdi. Qorytyndysynda Micromine Advance oqytý baǵdarlamasyn engizý, lıtologıalyq jáne gıdrologıalyq model ázirleý, Geobank júıesimen jumys isteýge oqytý jáne sıfrlyq quraldardy odan ári damytý týraly sheshim qabyldandy.
Sondaı-aq arnaıy tehnıkany ár 3-5 jyl saıyn josparly túrde aýystyrý sıklyn engizý, jumys ornynyń korporatıvtik standartyn ázirleý, shyǵynnyń tıimdiligin arttyrý maqsatynda tehnıka parkin birizdendirý, sondaı-aq jabdyqtardy jetkizý jáne olarǵa servıstik qyzmet kórsetý boıynsha strategıalyq seriktesterdi aıqyndaý jóninde sheshim qabyldandy.
Geologıalyq jáne marksheıderlik bólimsheler úshin eskirgen ǵımarattardyń ornyna jańa ákimshilik-turmystyq keshen salý máselesi talqylandy.
Jezqazǵan qalasynda ornalasqan Ortalyq Azıadaǵy alǵashqy Geologıalyq klasterdiń jumysyna erekshe nazar aýdaryldy. Jalpy aýdany 14 myń sharshy metrden asatyn keshen 200 jumys ornyna arnalǵan. Onyń qurylymyna oqý ortalyǵy, kitaphana, jataqhana, ALS analıtıkalyq zerthanasy, Colorado School of Mines ýnıversıtetimen birlesip ashylǵan Qazaqstandaǵy alǵashqy geofızıkalyq zerthana, murajaı, keńse ǵımaraty, jóndeý-mehanıkalyq sehy jáne kólemi 200 myń qýma metrden asatyn kern saqtaý qoımasy kiredi.
2026 jylǵa arnalǵan óndiristik jospar 31,6 mln tonna ken óndirýdi, shamamen 33 mln tonna kennen mys konsentratyn óńdep, shyǵarýdy kózdeıdi.
Jezqazǵan, Qaraǵandy jáne Balqash óńirleriniń kenishterinde, sondaı-aq Shatyrkól-Jaısań klasteri aýmaǵynda damý jobalaryn iske asyrý josparlanǵan. Atalǵan jobalar óndirý kólemin turaqtandyrýǵa, geomehanıkalyq ornyqtylyqty arttyrýǵa jáne ken oryndaryn paıdalaný merzimin 2032-2052 jyldarǵa deıin uzartýǵa baǵyttalǵan.
Ekologıa máselesi korporasıa úshin strategıalyq baǵyt bolyp qala beredi. Ekologıalyq tıimdilikti arttyrý baǵdarlamasyn iske asyrý aıasynda JMZ-da 34 is-shara, al BMZ-da aspırasıalyq jáne gaz tazalaý júıelerin jańǵyrtý boıynsha 28 is-shara ótkizý kózdelgen. Bul sharalar shyǵaryndylardy kezeń-kezeńimen eń úzdik qoljetimdi tehnologıalar normatıvine sáıkestendirýge múmkindik beredi.
Negizgi jobalardyń qatarynda Jezqazǵan jáne Balqash mys balqytý zaýyttarynda eki kúkirt qyshqyly sehyn salý jospary bar. Bul nysandar EÚQT normatıvine qol jetkizýdegi mańyzdy qadam bolmaq. Atalǵan keshender zıandy shyǵaryndylardyń mólsherin edáýir qysqartýǵa, zamanaýı ekologıalyq tehnologıany engizýge jáne óndiristik qýatty arttyrýǵa múmkindik beredi.
Sondaı-aq BMZ-ny jańǵyrtý máselesi talqylandy. Jańa zaýyttyń qurylysy katodty mys óndirisin jylyna 300 myń tonnaǵa deıin arttyrýǵa jáne Qazaqstan Respýblıkasyndaǵy barlyq qoljetimdi konsentratty óńdeýge múmkindik beredi.
Kezdesý qorytyndysynda jumyskerlerge áleýmettik qoldaý kórsetý máselesi sóz boldy. 2026 jyly áleýmettik baǵdarlamalardy qarjylandyrýǵa shamamen 11,9 mlrd teńge bólý kózdelgen.
Basqarma tóraǵasy Rýslan Óskenáli kásiporyn óndiristik úderisterdiń turaqtylyǵyn jáne eńbek ujymy aldyndaǵy barlyq áleýmettik mindettemelerdiń oryndalýyn qamtamasyz etip otyrǵanyn tilge tıek etip, árbir qyzmetkerdiń ál-aýqatyn arttyrýǵa basymdyq berilip, josparly jumys jalǵasa beretinin taǵy bir márte atap ótti.
