«Qazaqmys» korporasıasy taý-ken metalýrgıa keshenine ınjenerlerdi daıarlaý jáne qoldanbaly ǵylymı sheshimderdi engizý maqsatynda memlekettik organdarmen, ǵylymı jáne bilim berý uıymdarymen ózara is-qımyldy júıeli túrde damytyp keledi, dep habarlaıdy Dalanews.kz.
Qazaqstan Respýblıkasy Ǵylym jáne joǵary bilim mınıstri Saıasat Nurbek pen «Qazaqmys» korporasıasy» JSHS Basqarma tóraǵasy Rýslan Óskenáliniń jumys kezdesýinde ǵylymı-zertteý jáne tájirıbelik-konstrýktorlyq jumys salasyndaǵy yntymaqtastyqtyń negizgi baǵyttary, ınjenerlik jáne ǵylymı kadrlardy daıarlaý, sondaı-aq óndiristik úderisterdi sıfrlandyrý máseleleri talqylandy.
Taraptar Colorado School of Mines pen Ulytaý ýnıversıtetiniń birlesken fılıalyn ashý bastamasyna erekshe nazar aýdardy. Jobany iske asyrý bilim berý jáne ǵylymı-zertteý baǵdarlamalaryn damytýdy, halyqaralyq bilim berý standarttaryn engizýdi jáne Ulytaý oblysynyń ǵylymı-bilim berý áleýetin nyǵaıtýdy kózdeıdi.
Bilim berý modelin talqylaý barysynda «Qazaqmys» korporasıasy» JSHS men QR Ǵylym jáne joǵary bilim mınıstrligi jyl saıyn teń úles negizinde stýdentterdi úsh dıplomdy baǵdarlama boıynsha oqytýǵa 100 grant bóletin boldy. Bul bastama bes jylǵa josparlanǵan jáne Qazaqstanda ǵana emes, Ortalyq Azıa elderinde de ındýstrıany damytýǵa, sondaı-aq joǵary bilikti ınjenerlerdiń turaqty aǵynyn qalyptastyrýǵa baǵyttalǵan.
Kadr daıarlaý baǵytynda «Qazaqmys» korporasıasy ındýstrıalyq PhD baǵdarlamasyn iske asyrýǵa qatysady. Qazirgi kezde korporasıanyń 15 qyzmetkeri taý-ken isi jáne metalýrgıa salasyndaǵy beıindi baǵyttar boıynsha bilim alýda. Baǵdarlama ǵylymı ázirlemeler men zamanaýı tehnologıany óndiristik úderiske tikeleı engize alatyn mamandardy daıarlaýǵa baǵyttalǵan.
Korporasıa qyzmetkerlerin oqytý máselesinde «Bolashaq» baǵdarlamasy boıynsha yntymaqtastyq ornatý múmkindigi, sondaı-aq birlesken bilim berý jáne tálimgerlik bastamalardy damytý máseleleri talqylandy
Ǵylymı-tehnologıalyq hakatondardy damytý yntymaqtastyqtyń jeke baǵyty retinde aıqyndaldy. «Qazaqmys» korporasıasy naqty óndiristik mindetterdi sheshýge baǵyttalǵan salalyq hakatondardy ótkizýge qoldaý kórsetken alǵashqy ónerkásiptik kompanıa boldy. 2024-2025 jyldary korporasıanyń óndiristik jáne tehnologıalyq alańdarynda eki hakaton ótkizilip, sonyń aıasynda 23-ten astam óndiristik mindet qaraldy.
Taraptar 2026 jyldyń Sıfrlandyrý jáne jasandy ıntellekt jyly bolyp jarıalanýyn eskerip, bıyl ónerkásiptik sıfrlandyrýdy, avtomattandyrýdy jáne taý-ken metalýrgıa keshenine JI sheshimderin engizýdi damytýǵa baǵyttalǵan úshinshi ǵylymı-tehnologıalyq hakaton ótkizý josparyn rastady.
«Qazaqmys» korporasıasy Ulytaý oblysynyń bazasynda bilim jáne ǵylym ınfraqurylymyn damytýdy óńirdiń turaqty damýy men óndiristiń tehnologıalyq deńgeıin arttyrýdyń negizgi faktorlarynyń biri retinde qarastyrady. Ǵylym jáne bilim berý salasyndaǵy yntymaqtastyqty keńeıtý jónindegi jumys jalǵasyn tabady.
