«قازاقمىس» كورپوراسياسى تاۋ-كەن مەتاللۋرگيا كەشەنىنە ينجەنەرلەردى دايارلاۋ جانە قولدانبالى عىلىمي شەشىمدەردى ەنگىزۋ ماقساتىندا مەملەكەتتىك ورگاندارمەن، عىلىمي جانە ءبىلىم بەرۋ ۇيىمدارىمەن ءوزارا ءىس-قيمىلدى جۇيەلى تۇردە دامىتىپ كەلەدى، دەپ حابارلايدى Dalanews.kz.
قازاقستان رەسپۋبليكاسى عىلىم جانە جوعارى ءبىلىم ءمينيسترى ساياسات نۇربەك پەن «قازاقمىس» كورپوراسياسى» ج ش س باسقارما ءتوراعاسى رۋسلان وسكەنالىنىڭ جۇمىس كەزدەسۋىندە عىلىمي-زەرتتەۋ جانە تاجىريبەلىك-كونسترۋكتورلىق جۇمىس سالاسىنداعى ىنتىماقتاستىقتىڭ نەگىزگى باعىتتارى، ينجەنەرلىك جانە عىلىمي كادرلاردى دايارلاۋ، سونداي-اق وندىرىستىك ۇدەرىستەردى سيفرلاندىرۋ ماسەلەلەرى تالقىلاندى.
تاراپتار Colorado School of Mines پەن ۇلىتاۋ ۋنيۆەرسيتەتىنىڭ بىرلەسكەن فيليالىن اشۋ باستاماسىنا ەرەكشە نازار اۋداردى. جوبانى ىسكە اسىرۋ ءبىلىم بەرۋ جانە عىلىمي-زەرتتەۋ باعدارلامالارىن دامىتۋدى، حالىقارالىق ءبىلىم بەرۋ ستاندارتتارىن ەنگىزۋدى جانە ۇلىتاۋ وبلىسىنىڭ ءعىلىمي-بىلىم بەرۋ الەۋەتىن نىعايتۋدى كوزدەيدى.
ءبىلىم بەرۋ مودەلىن تالقىلاۋ بارىسىندا «قازاقمىس» كورپوراسياسى» ج ش س مەن ق ر عىلىم جانە جوعارى ءبىلىم مينيسترلىگى جىل سايىن تەڭ ۇلەس نەگىزىندە ستۋدەنتتەردى ءۇش ديپلومدى باعدارلاما بويىنشا وقىتۋعا 100 گرانت بولەتىن بولدى. بۇل باستاما بەس جىلعا جوسپارلانعان جانە قازاقستاندا عانا ەمەس، ورتالىق ازيا ەلدەرىندە دە يندۋستريانى دامىتۋعا، سونداي-اق جوعارى بىلىكتى ينجەنەرلەردىڭ تۇراقتى اعىنىن قالىپتاستىرۋعا باعىتتالعان.
كادر دايارلاۋ باعىتىندا «قازاقمىس» كورپوراسياسى يندۋستريالىق PhD باعدارلاماسىن ىسكە اسىرۋعا قاتىسادى. قازىرگى كەزدە كورپوراسيانىڭ 15 قىزمەتكەرى تاۋ-كەن ءىسى جانە مەتاللۋرگيا سالاسىنداعى بەيىندى باعىتتار بويىنشا ءبىلىم الۋدا. باعدارلاما عىلىمي ازىرلەمەلەر مەن زاماناۋي تەحنولوگيانى وندىرىستىك ۇدەرىسكە تىكەلەي ەنگىزە الاتىن مامانداردى دايارلاۋعا باعىتتالعان.
كورپوراسيا قىزمەتكەرلەرىن وقىتۋ ماسەلەسىندە «بولاشاق» باعدارلاماسى بويىنشا ىنتىماقتاستىق ورناتۋ مۇمكىندىگى، سونداي-اق بىرلەسكەن ءبىلىم بەرۋ جانە تالىمگەرلىك باستامالاردى دامىتۋ ماسەلەلەرى تالقىلاندى
عىلىمي-تەحنولوگيالىق حاكاتونداردى دامىتۋ ىنتىماقتاستىقتىڭ جەكە باعىتى رەتىندە ايقىندالدى. «قازاقمىس» كورپوراسياسى ناقتى وندىرىستىك مىندەتتەردى شەشۋگە باعىتتالعان سالالىق حاكاتونداردى وتكىزۋگە قولداۋ كورسەتكەن العاشقى ونەركاسىپتىك كومپانيا بولدى. 2024-2025 جىلدارى كورپوراسيانىڭ وندىرىستىك جانە تەحنولوگيالىق الاڭدارىندا ەكى حاكاتون وتكىزىلىپ، سونىڭ اياسىندا 23-تەن استام وندىرىستىك مىندەت قارالدى.
تاراپتار 2026 جىلدىڭ سيفرلاندىرۋ جانە جاساندى ينتەللەكت جىلى بولىپ جاريالانۋىن ەسكەرىپ، بيىل ونەركاسىپتىك سيفرلاندىرۋدى، اۆتوماتتاندىرۋدى جانە تاۋ-كەن مەتاللۋرگيا كەشەنىنە جي شەشىمدەرىن ەنگىزۋدى دامىتۋعا باعىتتالعان ءۇشىنشى عىلىمي-تەحنولوگيالىق حاكاتون وتكىزۋ جوسپارىن راستادى.
«قازاقمىس» كورپوراسياسى ۇلىتاۋ وبلىسىنىڭ بازاسىندا ءبىلىم جانە عىلىم ينفراقۇرىلىمىن دامىتۋدى ءوڭىردىڭ تۇراقتى دامۋى مەن ءوندىرىستىڭ تەحنولوگيالىق دەڭگەيىن ارتتىرۋدىڭ نەگىزگى فاكتورلارىنىڭ ءبىرى رەتىندە قاراستىرادى. عىلىم جانە ءبىلىم بەرۋ سالاسىنداعى ىنتىماقتاستىقتى كەڭەيتۋ جونىندەگى جۇمىس جالعاسىن تابادى.
