Jezqazǵan jáne Sátbaev qalalarynda Naýryz meıramyna arnalǵan is-sharalar ótti. Bul merekelik sharalar qala turǵyndary men «Qazaqmys» kompanıalar tobynyń qyzmetkerlerin bir arnaǵa toǵystyrdy.

Kompanıa tarapynan Jezqazǵan men Sátbaev qalalarynda mereke qarsańynda uıymdastyrylǵan etnoaýyl merekeniń basty alańyna aınaldy. Qala ortalyǵynda 11 kıiz úı tigilip, olardyń árqaısysy ulttyq mádenıettiń kórinisin, qonaqjaılyq dástúrin jáne halyqtyń ózindik bolmysyn tanytty.

Merekelik baǵdarlama aıasynda ulttyq sport túrlerinen jarystar uıymdastyrylyp, oǵan kásiporyn qyzmetkerleri men qala turǵyndarynan quralǵan komandalar qatysty. Jalpy júlde qory 3 mıllıon teńgeni qurady. Bul oıyndar tek tartysty doda ǵana emes, birlik pen dástúrge qurmettiń, komandalyq rýhtyń aıqyn kórinisine aınaldy.

İs-sharanyń basty kezeńi «Qazaqmys» kompanıalar toby kásiporyndary arasynda ótken «Úzdik kıiz úı» baıqaýy boldy.

Baıqaý qorytyndysy boıynsha I oryndy Batys Jezqazǵan kenishiniń ujymy uıymdastyrǵan kıiz úı ıelendi. II oryn – Mamandandyrylǵan jóndeý-mehanıkalyq basqarmasyna buıyrdy. III oryn «Jomart» kenishiniń kıiz úıine berildi.

Sonymen qatar, arnaıy nomınasıalar boıynsha «Jylandy» kenishi, Kazakhmys Maintenance Services, Kazakhmys Barlau, Jezqazǵan tarıhı-arheologıalyq mýzeıi, Ońtústik Jezqazǵan kenishi, Shyǵys Jezqazǵan kenishi, Jezqazǵan mys balqytý zaýyty jáne Jezqazǵan baıytý fabrıkasynyń kıiz úıleri marapattaldy.

Jeńimpazdar men nomınasıa ıegerlerine aqshalaı sertıfıkattar tabystaldy.