«Qazaqmys» korporasıasynda 2026 jylǵa arnalǵan óndiristik qaýipsizdik jáne eńbekti qorǵaý jospary bekitildi. Ol óndiristik úderis pen tehnıkalyq tekserýdi jáne negizgi kenishterdegi táýekelderdi baǵalaý nátıjesinde ázirlendi, dep habarlaıdy Dalanews.kz.
Jezqazǵan óńiriniń eńbek ujymymen ótken jumys kezdesýinde kompanıa basshylyǵy qaýipsizdikti damýdyń basty basymdyǵy dep belgiledi. Bul ustanym naqty sheshim men jyldyq josparda bekitildi.
2026 jyly kompanıa jekelegen sharalarǵa emes, syn-qatermen júıeli jumys isteýge nazar aýdarady. Jumysty uıymdastyrýǵa, operasıalardy oryndaý standarttaryna, qyzmetkerlerdi oqytýǵa jáne baqylaý quraldaryna qatysty ózgeris engiziledi.
Óndiristiń eń kúrdeli jáne táýekeli joǵary ýchaskesi retinde jerasty jumysyna erekshe nazar aýdarylady. Qaýipsizdik máselesi tehnıkany jańǵyrtýmen, ınvestısıamen jáne geologıalyq barlaý salasyn damytýmen qatar qarastyrylady. Qatań baqylaýdy talap etetin operasıalar men faktorlardyń tizimi anyqtaldy. Olarǵa qosymsha tekserý jáne standartty saqtaý boıynsha qatań talap engiziledi. Osy sharalardyń júzege asyrylýyna óndiristik alańdardyń basshylary tikeleı jaýapty bolady.
Sonymen qatar qaıtalanatyn jumystar úshin standartty operasıalyq rásimder (SOR) engiziledi. Biryńǵaı algorıtmder qatelerdiń sanyn jáne adam faktorynyń yqpalyn azaıtýǵa múmkindik beredi.
Búginde praktıkalyq oqytý baǵdarlamasy keńeıtilýde. Trenıńter naqty óndiristik jaǵdaıdy taldaýǵa negizdeledi. Jelilik basshylardy daıarlaýǵa erekshe nazar aýdarylady, sebebi olar kúndelikti qaýipsizdik talaptarynyń saqtalýyn baqylaıdy.
Sondaı-aq óndiristik qaýipsizdik deńgeıin arttyrý, qyzmetkerlerdi táýekelder jáne olardyń aldyn alý sharalary týraly aqparattandyrý maqsatynda kompanıa eńbekti qorǵaý men óndiristik qaýipsizdik salasyndaǵy ishki baılanysty kúsheıtýde. Osy úshin oqytý beınematerıaldary, taqyryptyq bannerler, plakattar, aqparattyq grafıka jáne sıfrlyq komýnıkasıa arnalary qoldanylady. Bul qyzmetkerlerdi yqtımal qaýip, jumysty qaýipsiz oryndaý erejeleri jáne oqıǵalardyń aldyn alýdyń ozyq tájirıbesi týraly der kezinde habardar etýge baǵyttalǵan.
Aýysym aldyndaǵy medısınalyq baqylaýdyń avtomattandyrylǵan júıesi ilki joba retinde iske qosylady. Ol qyzmetkerlerdiń jumysqa daıyndyǵyn obektıvti baǵalaýǵa jáne densaýlyq jaǵdaıyna baılanysty týyndaýy múmkin táýekel deńgeıin tómendetýge múmkindik beredi. Sonymen qatar nusqama men óndiristik talqylaý júrgizý formaty jańartylýda. Oqys oqıǵany taldaý jáne odan alynǵan sabaq turaqty tájirıbeniń bir bóligine aınalady. Kompanıa árbir jumyskerdiń ómiri men densaýlyǵyna qaýip tóngen jaǵdaıda jumysty toqtatý quqyǵyn rastaıdy.
Kompanıada qaýipsizdik kúndelikti basqarýshylyq mindet retinde qarastyrylady. 2026 jyly óndiristegi nátıjeler úshin basshylardyń praktıkalyq is-áreketi men jeke jaýapkershiligine erekshe nazar aýdaryldy.
