«قازاقمىس» كورپوراسياسىندا 2026 جىلعا ارنالعان وندىرىستىك قاۋىپسىزدىك جانە ەڭبەكتى قورعاۋ جوسپارى بەكىتىلدى. ول وندىرىستىك ۇدەرىس پەن تەحنيكالىق تەكسەرۋدى جانە نەگىزگى كەنىشتەردەگى تاۋەكەلدەردى باعالاۋ ناتيجەسىندە ازىرلەندى، دەپ حابارلايدى Dalanews.kz.
جەزقازعان ءوڭىرىنىڭ ەڭبەك ۇجىمىمەن وتكەن جۇمىس كەزدەسۋىندە كومپانيا باسشىلىعى قاۋىپسىزدىكتى دامۋدىڭ باستى باسىمدىعى دەپ بەلگىلەدى. بۇل ۇستانىم ناقتى شەشىم مەن جىلدىق جوسپاردا بەكىتىلدى.
2026 جىلى كومپانيا جەكەلەگەن شارالارعا ەمەس، سىن-قاتەرمەن جۇيەلى جۇمىس ىستەۋگە نازار اۋدارادى. جۇمىستى ۇيىمداستىرۋعا، وپەراسيالاردى ورىنداۋ ستاندارتتارىنا، قىزمەتكەرلەردى وقىتۋعا جانە باقىلاۋ قۇرالدارىنا قاتىستى وزگەرىس ەنگىزىلەدى.
ءوندىرىستىڭ ەڭ كۇردەلى جانە تاۋەكەلى جوعارى ۋچاسكەسى رەتىندە جەراستى جۇمىسىنا ەرەكشە نازار اۋدارىلادى. قاۋىپسىزدىك ماسەلەسى تەحنيكانى جاڭعىرتۋمەن، ينۆەستيسيامەن جانە گەولوگيالىق بارلاۋ سالاسىن دامىتۋمەن قاتار قاراستىرىلادى. قاتاڭ باقىلاۋدى تالاپ ەتەتىن وپەراسيالار مەن فاكتورلاردىڭ ءتىزىمى انىقتالدى. ولارعا قوسىمشا تەكسەرۋ جانە ستاندارتتى ساقتاۋ بويىنشا قاتاڭ تالاپ ەنگىزىلەدى. وسى شارالاردىڭ جۇزەگە اسىرىلۋىنا وندىرىستىك الاڭداردىڭ باسشىلارى تىكەلەي جاۋاپتى بولادى.
سونىمەن قاتار قايتالاناتىن جۇمىستار ءۇشىن ستاندارتتى وپەراسيالىق راسىمدەر (سور) ەنگىزىلەدى. ءبىرىڭعاي الگوريتمدەر قاتەلەردىڭ سانىن جانە ادام فاكتورىنىڭ ىقپالىن ازايتۋعا مۇمكىندىك بەرەدى.
بۇگىندە پراكتيكالىق وقىتۋ باعدارلاماسى كەڭەيتىلۋدە. ترەنينگتەر ناقتى وندىرىستىك جاعدايدى تالداۋعا نەگىزدەلەدى. جەلىلىك باسشىلاردى دايارلاۋعا ەرەكشە نازار اۋدارىلادى، سەبەبى ولار كۇندەلىكتى قاۋىپسىزدىك تالاپتارىنىڭ ساقتالۋىن باقىلايدى.
سونداي-اق وندىرىستىك قاۋىپسىزدىك دەڭگەيىن ارتتىرۋ، قىزمەتكەرلەردى تاۋەكەلدەر جانە ولاردىڭ الدىن الۋ شارالارى تۋرالى اقپاراتتاندىرۋ ماقساتىندا كومپانيا ەڭبەكتى قورعاۋ مەن وندىرىستىك قاۋىپسىزدىك سالاسىنداعى ىشكى بايلانىستى كۇشەيتۋدە. وسى ءۇشىن وقىتۋ بەينەماتەريالدارى، تاقىرىپتىق باننەرلەر، پلاكاتتار، اقپاراتتىق گرافيكا جانە سيفرلىق كوممۋنيكاسيا ارنالارى قولدانىلادى. بۇل قىزمەتكەرلەردى ىقتيمال ءقاۋىپ، جۇمىستى ءقاۋىپسىز ورىنداۋ ەرەجەلەرى جانە وقيعالاردىڭ الدىن الۋدىڭ وزىق تاجىريبەسى تۋرالى دەر كەزىندە حاباردار ەتۋگە باعىتتالعان.
اۋىسىم الدىنداعى مەديسينالىق باقىلاۋدىڭ اۆتوماتتاندىرىلعان جۇيەسى ىلكى جوبا رەتىندە ىسكە قوسىلادى. ول قىزمەتكەرلەردىڭ جۇمىسقا دايىندىعىن وبەكتيۆتى باعالاۋعا جانە دەنساۋلىق جاعدايىنا بايلانىستى تۋىنداۋى مۇمكىن تاۋەكەل دەڭگەيىن تومەندەتۋگە مۇمكىندىك بەرەدى. سونىمەن قاتار نۇسقاما مەن وندىرىستىك تالقىلاۋ جۇرگىزۋ فورماتى جاڭارتىلۋدا. وقىس وقيعانى تالداۋ جانە ودان الىنعان ساباق تۇراقتى تاجىريبەنىڭ ءبىر بولىگىنە اينالادى. كومپانيا ءاربىر جۇمىسكەردىڭ ءومىرى مەن دەنساۋلىعىنا ءقاۋىپ تونگەن جاعدايدا جۇمىستى توقتاتۋ قۇقىعىن راستايدى.
كومپانيادا قاۋىپسىزدىك كۇندەلىكتى باسقارۋشىلىق مىندەت رەتىندە قاراستىرىلادى. 2026 جىلى وندىرىستەگى ناتيجەلەر ءۇشىن باسشىلاردىڭ پراكتيكالىق ىس-ارەكەتى مەن جەكە جاۋاپكەرشىلىگىنە ەرەكشە نازار اۋدارىلدى.
