«Qazaqmys» korporasıasy aksıoner Nurlan Artyqbaevqa jáne Baqylaý keńesine 2026 jylǵy birinshi toqsannyń qorytyndysyn usyndy. İs-sharaǵa Basqarma tóraǵasy Rýslan Óskenáli, Baqylaý keńesiniń tóraǵasy Nurmuhambet Ábdibekov, basqarma tóraǵasynyń orynbasarlary jáne baǵyttarǵa jetekshilik etetin basshylar qatysty. Munda ónerkásiptik qaýipsizdik pen eńbekti qorǵaý máseleleri, óndiristik kórsetkish, áleýmettik saıasat jáne korporasıanyń odan ári damý kezeńderi talqylandy, dep habarlaıdy Dalanews.kz.
Esepti kezeń júıeli ózgeristerge kóshý kezeńine aınaldy. Aksıonerlik qurylym men basqarý modeli jańartylǵannan keıin kompanıada baqylaý men ınvestısıalyq tártip kúsheıtilip, qaýipsizdikke, jóndeý jumysyna jáne eńbek jaǵdaıyna erekshe kóńil bólindi. Bul óndiristik kórsetkishten de, ishki úderis sapasynan da kórinis tapty. Bul rette jańa basshylyq áleýmettik turaqtylyqty saqtaýǵa degen ustanymyn rastady jáne eńbek ujymy aldyndaǵy barlyq mindettemelerdi oryndaýdy óz moınyna aldy.
Kompanıa Ujymdyq shart talaptaryn iske asyrýdy jalǵastyrýda, toqsandyq syıaqy tóleýdiń qoldanystaǵy tártibi saqtalyp, jumyskerler men olardyń otbasyna arnalǵan áleýmettik qoldaý sharalary júzege asyrylýda. Aqpan aıynda jumyskerlerge tabystyń ındekstelgen tólemi berildi, al sáýirde kezekti toqsandyq syıaqy tóleý josparlanǵan. 2026 jyldyń birinshi toqsanynda kompanıada ólimmen aıaqtalǵan jazataıym oqıǵa tirkelgen joq, al óz qyzmetkerlerimiz arasynda jaraqattanǵandar sany 41%-ǵa azaıdy. Bul óndiristik qaýipsizdik salasyndaǵy jaǵdaıdyń aıtarlyqtaı jaqsarǵanyn kórsetedi.
Jańa basqarýshy komanda nazaryn tek kórsetkishterge ǵana emes, sonymen qatar óndiristegi naqty tájirıbelik ózgeristerge aýdardy. Tek naýryz aıynda kompanıa basshylyǵy óndiris oryndaryn 950 ret tikeleı aralady, al jumys oryndaryndaǵy sanıtarlyq-turmystyq jaǵdaıdy jaqsartýǵa 3,8 mlrd teńge qarajat bólindi. Bul sheshimder basshylyqtyń ujymmen tikeleı ári turaqty ózara is-qımylǵa kóshkenin, sondaı-aq qordalanyp qalǵan turmystyq jáne uıymdastyrýshylyq máselelerdi jedel sheshýge baǵyttalǵanyn kórsetti.
Birinshi toqsanda áleýmettik jaǵynan osal topqa jatatyn 13 otbasyǵa jańa páterdiń kilti tabystaldy, al jyl sońyna deıin 173 qyzmetkerdi turǵyn úımen qamtý josparlanyp otyr. Toqsannyń óndiristik qorytyndysy boıynsha kompanıa ótken kezeńderden qalǵan tehnıkalyq shekteýlerge qaramastan turaqtylyǵyn saqtady. Bul óndirilgen kendegi mys quramy boıynsha jospardy 3,7%-ǵa asyra oryndaýǵa jáne 68,6 myń tonna kórsetkishine qol jetkizýge múmkindik berdi. Konsentrattaǵy mys óndirisi 62,5 myń tonnany (+2,3%), al katodty mys óndirisi 96,6 myń tonnany (+0,69%) qurady. Eń mańyzdysy — bul nátıjege jańa komanda burynnan jınalyp qalǵan máselelerdi sheshýge kirisken kezeńde qol jetkizdi. Birqatar qıyndyq 2025 jyly jóndeý qoryn ońtaılandyrýǵa jáne jóndeý-qalpyna keltirý jumysyna qajetti qosalqy bólshekterdiń tapshylyǵyna baılanysty týyndady. Osy rette 2026 jyldyń birinshi toqsanynda kompanıa ınvestısıalyq jáne jóndeý jumysyn kúsheıtýge kóshti. Óndirý sektorynda tozyǵy jetken 30 birlik jerasty tehnıkasyn aýystyrý týraly sheshim qabyldandy, al osy úsh aı ishinde maquldanǵan ınvestısıanyń jalpy kólemi 245 mln dollardan asty. Jumys aýqymy óndiristik, ınfraqurylymdyq jáne áleýmettik baǵyttardy qatar qamtydy: jabdyqty jańǵyrtý, jóndeý jumysyn kúsheıtý, turmystyq nysandardy jańartý, jumyskerlerge arnalǵan turǵyn úı baǵdarlamasyn jalǵastyrý, qaýipsizdikti arttyrý jáne jańa aımaqtyq jobalardy iske qosý qolǵa alyndy. Uzaq merzimdi turaqtylyqqa basymdyq berildi. Geologıalyq barlaý salasynda toqsan ishinde mys qory 132,2 myń tonnaǵa artty.
Sonymen qatar kompanıa áleýmettik jáne óńirlik baǵytta aýqymdy jumysty jalǵastyrýda. Birinshi toqsanda Ulytaý, Abaı, Qaraǵandy oblystarynyń jáne Jambyl oblysy Shý aýdanynyń ákimdikterimen yntymaqtastyq týraly memorandýmǵa qol qoıyldy. Áleýmettik jáne ınfraqurylymdyq jobalardy damytýǵa 44,6 mlrd teńgeden astam qarajat baǵyttalatyn boldy. Kelisim densaýlyq saqtaý, bilim berý, sport nysandaryn salý men jańǵyrtýdy, sondaı-aq jergilikti bıznesti qoldaýdy jáne ınjenerlik ınfraqurylymdy damytýdy kózdeıdi.
Bul jaıt kompanıadaǵy ózgeristerdiń tek óndiristik baǵytpen shektelmeı, jumyskerlerdiń otbasy men ózine qatysy bar óńirler aldyndaǵy jaýapkershiligin sezinip otyrǵanyn kórsetedi. Birinshi toqsannyń qorytyndysy aksıonerlik qurylym men basqarý tásilderi jańartylǵannan keıin Qazaqmysta júıeli jumys úlgisi qalyptasyp jatqanyn aıǵaqtaıdy.
Qaýipsizdikke qoıylatyn talap kúsheıtilip, atqarýshylyq tártip nyǵaıtyldy, ınvestısıalyq belsendilik artyp, eńbek ujymymen tikeleı baılanys ornatyldy. Oń ózgerister birinshi toqsannyń ózinde-aq naqty nátıje berdi. Buǵan ólimmen aıaqtalǵan jaraqattyń bolmaýy, zardap shekkender sanynyń azaıýy jáne negizgi óndiristik kórsetkishterdiń asyra oryndalýy dálel. Kompanıa tıimdilikti, qaýipsizdikti jáne eńbek jaǵdaıyn birtutas júıe retinde qarastyratyn modelge birtindep kóship jatyr.
