Bir jyldan beri eńbekaqylaryn ala almai júrgen "Qazaqfilm" kinostýdiiasynyń mýltfilm jasaýshylary narazylyqqa shyqty, dep habarlaidy Dalanews.kz.
Aitýlarynsha, búginde basshylyqtyń 500 mln teńgege jýyq bereshegi bar.
KTK telearnasynyń aqparatynsha, bereshegi kóbeigen basshylyq keiin kele animatsiia bólimin jaýyp tastaǵan.
"Máselen "Altyn adam" jobasynda byltyr tamyz aiynan beri bizdiń ujym — sýretshiler, animatorlar eńbekaqysyn ala almai kele jatyr. Munda 5 millionnan bastap, 3 millionǵa deiin jumys istegen mamandar bar. Alatyn jumysymyzdyń aqshasy osy, bir jerde ǵana. Biz syrtta jumys istemeimiz. Eńbekaqymyzdy bersin. Bul jerde bárimizde kelisimshart bar. Zańdy túrde istegenbiz. Qaǵaz bar. Bir tiynymyzdy qaldyrmai tólesin", - dedi animatsiia bóliminiń qyzmetkeri Janádil Baidarbekov.
Animatorlardyń qara terge batyp birneshe jyl boiy istegen týyndylarynyń biri — "Altyn adam" atty tolyq metrli mýlt jobasy byltyr tolyq aiaqtalypty. Biraq memleketten bólingen tiisti qarajat áli kúnge deiin qyzmetkerlerge berilmegen. Eńbekaqysyn kúte-kúte qaryzǵa belshesinen batqan óner adamdary bul bylyqty basshylyqtyń uiymdastyryp otyrǵanyna senimdi.
"Túrme siiaqty. Temir tormen qorshalǵan bári. Munda túrmeniń ,búkil "pahandyq" rejimi ornady. Keshe saqshylary kelip, myna jastardy qýyp shyǵyp, neshe túrli jala jaýyp, animatsiiany jaýyp qoiyp, túrmedegidei "shmon" jasap jatyr. Bul bandittik shabýyl dep baǵalaý kerek. Azamat Satybaldynyń ózi róldi oinap júr. Biraq kimniń rólin oinap júrgenin bilmeidi. Qazir Azamat Satybaldyny,"Qazaqfilmniń" prezidentin týra osy jerge shaqyryp, jaýap berýin talap etemiz", - deidi animatsiia bóliminiń redaktory Erlan Tóleýtai.
Qyzmetkerlerdiń bazynazyn tyńdaǵan tilshi, basshylyqtyń da jaýabyn bilmek bolǵan.
"Azamat Satybaldy azamattyq tanytyp, aldyna shyǵýdyń ornyna, joq boldy. Qol astyndaǵy qyzmetkerleriniń talap-tilegine basyn qatyrǵysy kelmeitin syńaily. Ózi shyqpady. Qońyraýǵa da jaýap qatpady. Onyń ornyna orynbasary keldi. "Altyn adam" jobasy boiynsha 88 million teńge qaryzy bar ekenin rastap otyr. Biraq onyń jaýaby jurttyń kóńilin kónshitpedi", - delingen telearna habarlamasynda.
Onyń aitýynsha jobany, tapsyrys berýshiler qabyldamaǵan.
"Negizi "Altyn adam" jobasy boiynsha jaǵdai bylai. Bizde Ulttyq kinony qoldaý memlekettik ortalǵymen kelisimshart boldy. Olar mýltfilmge 2020 jyly tapsyrys bergen. Biz týyndyny 100 paiyz jasap jibergenbiz. Biraq tapsyrys berýshi qabyldamady. Qazir osyǵan qatysty sot isi júrip jatyr", - dedi "Qazaqfilm" kinostýdiiasynyń vitse-prezidenti Aidar Omarov.
Tilshi tolyqmetraj mýltiplikatsi jobasyna tapsyrys berip, keiin qabyldamai qoiǵan Ulttyq kinony qoldaý memlekettik ortalyǵyna da shyǵyp kórmek bolǵan, alaida ol jaqtaǵylar da jaýap berýden bas tartqan.
