Bul týraly 23 qarasha kúni Qytaıdyń Sıan qalasynda ótken Qazaqstan-Qytaı BAQ ókilderiniń forýmynda «Batys Qytaı fılm» stýdıasynyń bas menejeri Jaý Ventaý málim etken. Qytaılyq news.sina.com saıtynyń habarlaýynsha, forýmda Jaý Ventaý úshinshi halyqaralyq "Jibek joly" kınofestıvali aıasynda Sháken Aımanov atyndaǵy "Qazaqfılm" AQ men "Batys Qytaı kınosy" korporasıasy seriktestik týraly memorandýmǵa qol qoıylǵandyǵyn, sondaı-aq ol memorandýmnyń eki eldiń mádenıet, kıno, televıdenıe salasyndaǵy yntymaqtastyǵyna oń ózgerister ákelgendigin aıta kelip, taraptardyń alǵashqy birlesken jobasy – «Mahabbat ótkelderi» fılmi túsiriletindigin jetkizdi.
Qytaıǵa tıgen qazaqstandyq qyz, fılmniń senarısi ári bas keıipkerdiń prototıpi Sofıa Ushyrovanyń aıtýynsha, týyndy, romantıkalyq komedıa janryndaǵy fılm bolmaq. Onda, qazaqstandyq zańger qyzben qytaılyq kasipker jigit arasyndaǵy mahabbat hıkaıasy baıandalady. Aıta keteıik, 1958 jyly «Batys Qytaı kınosy» kınokompanıasynyń negizi qalandy. Ol – Qytaıdaǵy 4 iri memlekettik kompanıanyń biri. Korporasıa halyqaralyq kınofestıvalderde tanymal. Qytaılyq kınostýdıada 1000-nan astam kórkem fılm túsirilip, olar 70-ten astam halyqaralyq syılyqqa ıe boldy.
