Astanada ótip jatqan «Qazirgi kezeńdegi ekstremizm men terrorizmniń aldyn alý men jolyn kesýdiń zańnamalyq jáne institýtsionaldyq sharalary» jiynynda qoǵam qairatkeri Berik Ábdiǵali osyndai pikir bildirdi, dep habarlaidy BNews.kz.
«Terrorizm men ekstremizm tek qana dinniń atyn jamylmaidy. Búgingi kúni ol múmkindiginshe qoǵamnyń narazy tustaryn paidalanyp qalǵysy keledi. Áleýmettik máseleniń de atyn jamylady, kerek deseńiz, erteń til máselesine de aralasady», — deidi Berik Ábdiǵali.
Onyń pikirinshe, búgingi qoǵamdaǵy qazaq tili máselesi sheshilmese, ol da ekstremizm men terrorizmge ákelýi ábden múmkin.
«Qazaq tili máselesin sheshpesek, úlken saiasi problemaǵa ainalýy yqtimal», — deidi qoǵam qairatkeri.
Berik Ábdiǵalidiń paiymdaýynsha, til, bilim salasyndaǵy reformalardy jer máselesi siiaqty qoǵam bolyp talqylaý qajet.
«Májilistiń osyndai bastamasyna tek qoldaý kórsetip, qoǵamdaǵy máselelerdi talqylaý kerek. Sonda ǵana ekstremizm men terrorizmniń aldyn alamyz», — degen senimin bildirdi ol.
