Almatyda «Alatau-Aqparat» mediaholdingi men Qyrǵyz ulttyq “Kabar” aqparattyq agenttigi arasynda ózara yntymaqtastyq týraly memorandýmǵa qol qoiyldy.
Saltanatty is-sharaǵa Qyrǵyz Respýblikasynyń Almatydaǵy Bas konsýly Jenishbek Asankýlov ta qatysyp, baýyrlas elder basshylary Qasym-Jomart Toqaev pen Sadyr Japarovtyń ár salada yntymaqtastyqty arttyrý saiasatynyń jemisti júrgizilip jatqanyn atap ótti.
«Alatau-Aqparat» mediaholdinginiń bas direktory Erjan Qalymbaiuly «Ejelden enshisi bólinbegen eki eldiń BAQ salasyndaǵy bailanysy óte mańyzdy. Jahandanǵan dáýirde eń jaqyn baýyr ári kórshi elmen ásirese, aqparat salasyndaǵy birlik, túsinistik pen qoldaýdy arttyrý zaman talaby. Bir-birimizden úirenetin ári bir-birimizge úiretetin dúnieler kóp»,- dedi.
Óz kezeginde Qyrǵyz ulttyq “Kabar” aqparattyq agenttiginiń direktory Mederbek Shermetaliev alda birlese atqarar mańyzdy jobalardy jasaý kerektigine toqtaldy.
Memorandýmda baýyrlas elderdiń aqparat salasynyń yntymaqtastyǵy men áriptestigin arttyrý kózdelgen. Sondai-aq qujatta taraptardyń ózara aqparat pen tájiribe almasý, birlese ortaq jobalar jasaý, sonymen qatar, eki eldiń BAQ ókilderine arnap dóńgelek ústelder, konferentsiialar t.b. is-sharalardy uiymdastyrý qarastyrylǵan.
“Kabar” aqparattyq agenttigi 1937 jyly qurylǵan. Qyrǵyzstan ǵana emes, Ortalyq Aziia boiynsha qyrǵyz, orys, aǵylshyn, arab, túrik jáne qytai tilderinde aqparat taratady.
2020 jyly qurylǵan «Alatau-Aqparat» mediaholdinginiń quramyna 1936 jyldan shyǵyp kele jatqan «Vechernii Almaty», 1988 jyldan shyǵyp kele jatqan «Almaty Aqshamy» gazetteri men aqshamnews.kz, vecher.kz jáne alnews.kz aqparatyq resýrstary kiredi.
