QR Oqý-aǵartý ministri Juldyz Súleimenova Almatyǵa jumys sapary barysynda IT-startap jetekshilerimen kezdesip, ulttyq bilim berý platformalaryn qalyptastyrý jaiyn talqylady, dep habarlaidy Dalanews.kz
Sala ministri geimifikatsiia men jasandy intellektini sátti qoldanyp júrgen Qalan matematikalyq platformasyn jasaýshylardyń ázirlemelermen tanysty. Vedomstvo muǵalimder men oqýshylardyń tsifrlyq daǵdylaryn damytýǵa jáne jasandy intellektini oqý protsesine tiimdi integratsiialaýǵa múddeli.
«Qazaq Digital Mektebi» jobasynyń negizgi maqsaty- jaratylystaný-matematikalyq jáne qoǵamdyq-gýmanitarlyq baǵyttaǵy pánderdi jasandy intellekt kómegimen oqytý. Joba aiasynda tańdalǵan jasandy intellekt kómegimen jasalǵan jańa sheshimder oqýshylarǵa materialdy óz betinshe igerýge múmkindik berip, olardy bilimdi belsendi tutynýshyǵa ainaldyrýy qajet.
«Biz qazir «Qazaq Digital Mektebi» jobasy aiasynda jasandy intellekt salasyndaǵy jobalardy suryptap jatyrmyz. Sondyqtan túrli otandyq ozyq platforma jasaýshylardyń usynystaryn qarastyrýǵa daiynbyz. Jobalar «Qazaq Digital Mektebi» jobasynyń mazmunyn baiytyp, oqýshylardy bilimdi passivti tutynýshy emes, belsendi igerýshige ainaldyrýy kerek», – dedi sala ministri Juldyz Súleimenova.
Qazirgi ýaqytta ministrlik janynan qurylǵan arnaiy jumys toby tsifrlyq damý baǵytyndaǵy zańnamaǵa túzetýler ázirleýde. Top quramynda IT-sarapshylar, memlekettik organ ókilderi men táýelsiz mamandar bar. Olar biylǵy jyldyń birinshi jartysynda bilim berý salasyndaǵy pilottyq jobalardyń tiimdiligin baǵalap, zańnamalyq jáne praktikalyq usynystar ázirleitin bolady.
