Talǵar qalasyndaǵy "Aqbulaq" olımpıadalyq ortalyǵynda salynatyn baza Ortalyq Azıadaǵy osyndaı alǵashqy akademıa bolmaq, – dep habarlaıdy Dalanews.kz Ispanıanyń EFE aqparat agenttigine silteme jasap.
Memleket basshysy óz Joldaýynda buqaralyq sportty damytý, halyqtyń densaýlyǵyn jaqsartý men balalar-jasóspirimder fýtbolynyń mańyzdylyǵyn erekshe atap ótken edi.
Osyǵan oraı 2023 jyly Doscar Group kompanıasy Qazaqstannyń Ispanıadaǵy Elshiligimen birlesip, ıspanıalyq "Atletıko Madrıd" fýtbol klýbymen kelissóz bastaǵan bolatyn. Bir jyldan astam ýaqytqa sozylǵan kelissóz 10 jyldyq kelisimshartqa qol qoıýmen aıaqtaldy.
Osylaısha 2024 jyly Qazaqstanda "Atletıko Madrıd" balalar-jasóspirimder akademıasyn qurý týraly tarıhı kelisimge qol jetkizildi. Bul TMD men Ortalyq Azıadaǵy ıspanıalyq klýbtyń alǵashqy resmı akademıasy bolmaq.
"Atletıko Madrıd" fýtbol klýbynyń prezıdenti Enrıke Sereso 2024 jyldyń maýsym aıynda Qazaqstanǵa kelip, jobany talqylaý úshin Memleket basshysy Qasym-Jomart Toqaevpen de kezdesken edi. Sonyń nátıjesinde kelisimshartqa qol qoıylyp, akademıa "Aqbulaq" olımpıadalyq ortalyǵynyń aýmaǵynda ornalasatyn boldy. Akademıa bolashaq fýtbol juldyzdaryn daıyndaýdyń erekshe ortalyǵy bolýǵa ýáde beredi.
"Atletıko Madrıd Qazaqstan" Akademıasy óz aldyna aıqyn mindet qoıyp otyr. Naqty aıtqanda - álemdik fýtbol qaýymdastyǵy moıyndaǵan ádistemeler negizinde joǵary sapaly fýtbol bilimin usyný. Ispanıadan kelgen kásibı jattyqtyrýshylar ár oqýshymen jeke jumys istep, olardyń tehnıkalyq jáne taktıkalyq daǵdylaryn damytady.
Akademıanyń negizgi jattyqtyrýshylar quramy Ispanıadan kelgen sertıfıkattary bar mamandar bolmaq. Qazaqstan men Ortalyq Azıanyń barlyq óńirlerinen balalardy iriktep, keıin Eýropanyń fýtbol alańdarynda ózin kórsetýge múmkindik alatyn neǵurlym talantty balalardy ıspanıalyq jattyqtyrýshylar men mamandardyń ózderi tikeleı júrgizedi.
Qazaqstannyń barlyq óńirinen kelgen balalar osy akademıada oqyp, jattyǵa alady. Bilim alýshylardyń bir bóligi tegin oqýǵa grant ta alady. Al úzdik tárbıelenýshiler Ispanıadaǵy "Atletıko Madrıd" klýbynyń bazasynda oqýy men jattyǵýyn jalǵastyrýǵa biregeı múmkindik alady.
Akademıa zamanaýı jattyǵý jáne oqý bazalarymen jabdyqtalady. Iaǵnı tabıǵı jáne jasandy jabyny bar alańdar, zamanaýı jattyǵý zaldary, mýltımedıalyq oqý synyptary, ońaltý ortalyqtary, keń kıim aýystyratyn bólmeler, demalys aımaqtary, qonaq úı kesheni jáne jas fýtbolshylarǵa arnalǵan jataqhana bolady. Akademıa bazasynda jas sportshylardyń halyqaralyq jarystarǵa beıimdelýin jeńildetý úshin aǵylshyn jáne ıspan tilderi kýrstary uıymdastyrylady. Munyń bári bolashaq fýtbol juldyzdaryn tárbıeleýge ońtaıly jaǵdaı jasaýdyń joly.
Bizdiń akademıanyń Qazaqstanda ashylýy jaı oqıǵa emes, bul fýtbol álemindegi naǵyz revolúsıa. Biz qazaqstandyq balalardyń zor áleýetke ıe ekendigine senimdimiz jáne bizdiń akademıa uly fýtbolshylar dúnıege keletin orynǵa aınalady. Biz munda eldegi fýtbol deńgeıin jańa bıikterge kóterý úshin ádisnamamyzdy, tájirıbemizdi jáne jeńiske degen umtylysymyzdy ákelemiz, - deıdi "Atletıko Madrıd" klýbynyń akademıany damytý jáne halyqaralyq yntymaqtastyq jónindegi dırektory Emılıo Gýtıerrez Boloýza.
Osy atalǵan kelisimniń barlyǵy Doscar GROUP kompanıasynyń, Qazaqstannyń Ispanıadaǵy Elshiliginiń, Týrızm jáne sport mınıstrliginiń, Qazaqstan fýtbol federasıasynyń, Ispanıanyń Qazaqstandaǵy Elshiliginiń qoldaýynyń, sondaı-aq "Sport Asset Management" QB men "Atletıko Madrıd" fýtbol klýbynyń birlesken kúsh-jigeriniń arqasynda júzege asty.
Sonymen "Atletıko Madrıd Qazaqstan" Akademıasynyń ashylýy 2025 jylǵa josparlanyp otyr. Ol elimizdiń jas talanttaryna zor múmkindik bere otyryp, Qazaqstan men Ortalyq Azıada fýtboldy damytý úshin qýatty serpin bolmaq.
