Biyl "Qazaq ádebieti" gazetiniń jaryq kóre bastaǵanyna – 90 jyl. Ataýly mereke jyl basynan ártúrli deńgeide atalyp ótýde, dep habarlaidy Dalanews.kz.
Esterińizge sala keteiik, "Qazaq ádebieti" gazetiniń alǵashqy sany osydan toqsan jyl buryn, iaǵni 1934 jyldyń 10 qańtarynda jaryq kórgen bolatyn. Basylym áýelde Qazaqstan jazýshylar odaǵynyń organy retinde jaryq kórip turady. "Qazaq ádebieti" gazetiniń eń alǵashqy redaktory – jazýshy-dramatýrg Ǵabit Músirepov bolsa, jaýapty hatshysy – Muhamedjan Qarataev edi. Ol kezdegi gazettiń redaktsiia alqasynda kil myqtylar qyzmet etti. Aitalyq, aqyn Sáken Seifýllin, jazýshy Beiimbet Mailin, aqyn Iliias Jansúgirov, Iliias Qabylov, Áiteke Mýsinder boldy.
Soǵys jyldary, iaǵni gazet 1940 jyldan bastap 15 jyl shyqpai qalady. Keiin 1955 jyly qaitadan óziniń oqyrmandaryna jol tartady. Jyl basynda ádebi basylymdy Memleket basshysy quttyqtady. Almatyǵa arnaiy kelgen mádeniet jáne aqparat ministri Aida Balaeva "Qazaq ádebieti" gazetiniń ardagerleri men qazirgi qyzmetkerlerin quttyqtap, arnaiy marapattady. Sonymen birge, ministr qatysqan ádebi basylymnyń jiynynda merzimdi basylymnyń búgini men bolashaǵy týraly keleli otyrys ótkizip, basylymnyń erteńi, aldaǵy taǵdyry talqylandy.
Óz kezeginde Aida Ǵalymqyzy lebiz bildirip, Memleket basshysynyń quttyqtaýyn oqyp berdi: "Ǵasyrǵa jýyq ýaqyt ishinde gazet qalyń oqyrmany bar, bedeldi basylym retinde qalyptasyp, tól tarihymyzdyń jarshysyna ainaldy. Ádebietimizdiń altyn dáýiri qalyptasýǵa zor eńbek sińirgen aptalyq aldaǵy ýaqytta da ózine júktelgen mártebeli mindetti minsiz atqara beredi dep senemin. Barshalaryńyzǵa shyǵarmashylyq shabyt, tolaǵai tabys, baq-bereke tileimin" dedi. Gazet toiy jyl sońyna deiin jalǵasady, ártúrli janrlarda ádebi baiqaýlar ótedi, bul kúlli qazaq ádebietiniń toiy sebebi.
