Abai atyndaǵy «Jidebai-Bórili» memlekettik tarihi-mádeni jáne ádebi-memorialdyq mýzei-qoryǵynda «Qazaǵymnyń únisiń sen – dombyra!» atty kórme uiymdastyryldy. Atalýly shara Ulttyq dombyra kúnin keńinen nasihattaýǵa jáne qazaq halqynyń tól óneri men mádeni murasyn dáripteýge baǵyttalǵan, dep habarlaidy dalanews.kz.
Mýzei direktory Ulan Saǵadievtiń aitýynsha, 1 shildeden bastap kúshine engen jańa Konstitýtsiiada Qazaqstan halqynyń mádenieti men ulttyq bolmysyn damytýǵa erekshe mán berilgen.
– Mýzeiimizge kelgen barsha qonaqtarǵa qosh keldińizder deimin. Ózderińiz biletindei, 1 shildeden bastap jalpyhalyqtyq referendýmda qabyldanǵan Qazaqstan Respýblikasynyń jańa Konstitýtsiiasy kúshine endi. Bul – elimizdiń bolashaǵyn aiqyndaityn mańyzdy qujat. Osyndai aitýly kezeńde Ulttyq dombyra kúnine orai mýzeiimizde arnaiy kórme uiymdastyryp otyrmyz. Jańa Konstitýtsiiada mádeniet pen ulttyq ónerdi damytý máselesine erekshe kóńil bólingen. Kórmede kásibi oryndaýshylardyń mýzykalyq aspaptary qoiylǵan. Al qorymyzdaǵy eń qundy jádigerlerdiń biri – uly Abaidyń dombyrasy, – dedi Ulan Saǵadiev.
Mýzeidiń ekspozitsiialar men kórmelerdi uiymdastyrý bóliminiń meńgerýshisi Bulbulnaz Ýahmetova kórmede dáýirdiń rýhyn saqtap turǵan biregei jádigerler usynylǵanyn atap ótti.
– Búgin «Qazaǵymnyń únisiń sen – dombyra!» atty kórmeniń ashylýy ótýde. Munda belgili kúishi-oryndaýshylardyń mýzykalyq aspaptarymen qatar, mýzei qorynda saqtalǵan uly Abaidyń dombyrasy jáne Shákárimniń uly Ahattyń dombyrasy kópshilik nazaryna usynylyp otyr. Sonymen birge ár jyldary mýzeige elimizdiń ár óńirinen syiǵa tartylǵan dombyralar da kórmege qoiylǵan. Kórme bir ai boiy jumys isteidi. Barsha semeilikter men qala qonaqtaryn kelip kórýge shaqyramyz, – dedi Bulbulnaz Ýahmetova.
Kórmeniń ashylý saltanaty dombyranyń kúmbirlegen únimen órildi.
Shyǵarmashylyq ujymdardyń jas ónerpazdary kópshilikke tanymal kúilerdi oryndap, kórermenderdiń ystyq yqylasyna bólendi.
Kelýshiler jas dombyrashylardyń oryndaýshylyq sheberligi men názik mýzykalyq talǵamyna joǵary baǵa berdi.
