Qaırat Nurtastyń ákesi de kezinde án salǵan. Tek uly sıaqty úlken sahnalarda emes, kishigirim jıyndarda jáne dostarynyń ortasynda óz ónerin pash etken. Ánshilik qyzmettiń mol paıda alyp keletinin bilse de, Nurtas Aıdarbekov otbasynan aıyrylyp qalmaý úshin sahnaǵa shyǵýdan bas tartqan. Bul týraly onyń jubaıy Gúlzıra Aıdarbekova 31 arnanyń «Uıat emes» baǵdarlamasynda aıtyp berdi.
«Eshbir toı meniń joldasym án aıtpaı ótpeıtin. Sonda qanshama ánshiler joldasymnyń daýsynyń myqty ekenin alǵa tartyp, toılarǵa birge shyǵýǵa usynys jasaǵan edi. Men de olardyń sózin qoshtap, ánshilikten mol tabysqa keneletinimizdi aıttym. Sonda joldasym: «Sen qara shaı ishkenińe rıza bol. Nanǵa ýyldyryq nemese sary maı jaǵyp jemeı-aq qoı. Óıtkeni men adam balasymyn. Toı-toılap ketemin, kózge árnárse túsedi. Araq, qyz-kelinshekter… Men saıtan emespin, meniń de adasýym múmkin. Al men otbasymdy qatty jaqsy kóremin. Balamnan da, senen de aıyrylǵym kelmeıdi. Seniń minezińdi de, keshirmeıtinińdi de bilemin. Sondyqtan osy qara shaı isheıik, men shyqpaı aq qoıaıyn», – dedi.
– Biraq sony balamnan qatty kúttim. Qaırat ómirge kelgen kezde 6 kelinshek bir ýaqytta bosandyq. Altaýymyzdy bir palataǵa jatqyzdy. Qaıratty emizýge alyp keledi. Sonda kóbisiniń balalarynyń daýsy ashshy, sábı bolsa da jaǵymsyzdaý shyǵatyn. Kelinshekterdiń bári «Seniń balańnyń daýsy adamnyń júregin eljiretip jiberedi» deýshi edi, – deıdi Gúlzıra Úsenqyzy.
Derekkózi: stan.kz
