Sybailas jemqorlyqqa qarsy qyzmet agenttiginiń resmi ókili Daniiar Begaidarov elge qaitarylǵan aktivter týraly aitty. Onyń ishinde Nazarbaevtyń nemere inisi Qairat Satybaldyulyna qatysy bar múlikter de bar bolyp shyqty, - dep habarlaidy Dalanews.kz.
Antikor ókili 2022 jyly agenttik memleketke jáne kvazimemlekettik sektor sýbektilerine 1,1 trillion teńgeden asa aktivter men qarajattardy qaitarǵanyn eske saldy.
"Onyń ishinde 321,6 milliard teńge kólemindegi qarajat tikelei biýdjetke qaitaryldy. Qaitarylǵan aktivterdiń qataryna ákimshilik ǵimarattar, ekskliýziv asyl buiymdar, liýks úiler, páterler, avtokólikter, aktsiialar, kompaniialardaǵy úlester, temirjoldar men shetelden qaitarylǵan qarajattar kiredi", – dedi Begaidarov Antikor brifinginde.
Onyń aitýynsha, biyl birneshe nysan qaitarylǵan. Olardyń ishinde Almaty qalasyndaǵy quny 7,9 milliard teńge bolatyn "Qaisar Taýer" biznes ortalyǵy bar, bul ǵimarat Qazaq ulttyq qyzdar pedagogikalyq ýniversitetiniń qaramaǵyna berildi.
"Sonymen qatar, Qazaq ulttyq óner akademiiasyna quny 800 million teńgeden asatyn ákimshilik ǵimarat tapsyryldy. Elordada quny 5 milliard teńgeden asatyn úsh záýlim úi Astana ákimdiginiń balalarǵa arnalǵan psihologiialyq-pedagogikalyq túzetý kabineti kommýnaldyq memlekettik mekemesiniń balansyna berildi", – dedi ol.
Buǵan deiin bul nysandar Qairat Satybaldyulyna tiesili ekeni aitylǵan bolatyn.
Aita keteiik, Qairat Satybaldyuly 2022 jylǵy naýryzda qamaýǵa alyndy. Ol "Qazaqtelekom" jáne "Kólik servis ortalyǵy" kompaniialarynan aqsha jymqyrdy degen aiyppen 6 jylǵa sottalyp, túrmege qamalǵan edi. Sot onyń múlkin tárkilep, memlekettik qyzmette, ulttyq kompaniialarda qyzmet atqarý quqyǵynan aiyrdy.
Keiin Satybaldyulynyń Shyǵys Qazaqstan oblysyndaǵy koloniiada jazasyn óteitini belgili boldy.
Alaida keiinirek sot úkimi ózgerdi, túrme jazasy bas bostandyǵyn shekteý jazasyna (3 jyl 3 ai) aýystyryldy.
