Qaırat Satybaldyuly taǵy bir is boıynsha sotqa tartylatyny belgili boldy, - dep habarlaıdy Dalanews.kz.

Astana qalalyq sotynyń málimetine súıensek, qylmystyq ister jónindegi aýdanaralyq sotqa qylmystyq jolmen alynǵan aqshany zańdastyrý týraly is túsken. Iaǵnı Satybaldyulyna Qylmystyq kodekstiń 218-baby 3-bóliginiń 3-tarmaǵy boıynsha aıyp taǵylyp otyr.

Ashyq formattaǵy sot otyrysy 1 sáýir saǵat 10:00-ge belgilengen.

"Sybaılas jemqorlyqqa qarsy is qımyl agenttiginiń derekteri boıynsha aıyptalýshy bul aqshaǵa ártúrli múlik satyp alǵan jáne ony sheteldik bank shottaryna aýdarǵan", - dep jazylǵan derekterde. 

Aıta keteıik, 2022 jyly naýryzda Satybaldyuly shetelge qashyp bara jatqan jerinen ustalǵan bolatyn.

Al qyrkúıekte Astanada soty Qaırat Satybaldyulyn alty jylǵa bas bostandyǵynan aıyrýǵa úkim shyǵardy, onyń múlki tárkilendi jáne 10 jyl boıy memlekettik qyzmette jumys isteýge tyıym salyndy. Sot barysynda Satybaldyuly "Qazaqtelekom" jáne "Kólik servıs ortalyǵy" kompanıalaryna zalaldy óteý retinde ondaǵan mıllıard teńge tólegeni málimdeldi. Taraptar medıatıvtik kelisim jasasty. 

2023 jyly jeltoqsanda Qaırat Satybaldyuly 55 mıllıard teńgeden asa aqshany memleketke qaıtarǵan bolatyn. Antıkor Qaırat Satybaldyulyna jáne basqa da adamdarǵa qatysty júrgizilip jatqan tergeý sheńberinde elden zańsyz shyǵarylǵan aktıvterdi, onyń ishinde qylmystyq jolmen alynǵan aqshany jáne ózge de múlikti qaıtaryp jatqanyn habarlaǵan bolatyn.

Bıyl aqpanda Satybaldyulyna qatysty sotqa deıingi tergeý amaldary aıasynda búdjetke taǵy da shamamen 82,6 mıllıard teńge (185 mln AQSH dollary) tústi. Odan bólek Aqmola oblysynyń Qosshy qalasyndaǵy 942 gektar jer ýchaskesi memleketke qaıtaryldy. Onyń naryqtyq quny 13 mıllıard teńgeden asady.