Qazaqstanda Qaırat Satybaldynyń qolynda qandaı kásipteri qalǵany belgili boldy, - dep habarlaıdy Dalanews.kz shishkin.like telegram arnasyna silteme jasap.
Qaırat Satybaldy 2018 jyly eń baı qazaqstandyqtar tiziminde boldy. Forbes.kz onyń baılyǵyna - 163 mıllıon dollar degen baǵa berdi. Qazirgi tańda eks-prezıdenttiń nemere inisiniń baılyǵy odan kóp bolǵany anyqtaldy. 2,5 jylda Qaırat Satybaldy memleketke 700 mıllıard teńgeni óz erkimen qaıtarǵan. Odan bólek, ol Almatydaǵy eki iri kásibin, komersıalyq jyljymaıtyn múlik, Astanadaǵy elıtaly úıin, Dýbaı men Fransıadaǵy vıllalaryn, Máskeý, Bodrým, Ystambuldaǵy páterlerin, Rolls-Royce Cullinan jáne Aston Martin avtokólikterin, sonymen qatar, eksklúzıv áshekeı buıymdaryn memleketke qaıtardy.
Qazirgi tańda Satybaldyǵa tıesili birneshe kásip qana qalǵan. Mysaly ol «Qaırat» jeke halyqaralyq qaıyrymdylyq qorynyń quryltaıshysy nemese teń quryltaıshysy. Adata.kz málimetinshe, qor 2015 jyly qurylǵannan keıin 28 mıllıon teńge salyq tólegen. Onyń 791 myń teńge salyǵy 2023 jyly tólengen.
«Alataý Kapıtal Invest» JSHS - qordyń aktıvter portfelin senimgerlik basqarýǵa baılanysty qyzmetpen aınalysady. Kompanıa 2016 jyly qurylyp, jalpy 10,5 mıllıon teńge salyq tólegen.
«Amır LTD» JSHS - saýda, qurylys, kólik-ekspedısıalyq qyzmettermen aınalysqan qazir kompanıa taratylyp jatyr.
"Aq Orda "respýblıkalyq qozǵalysy" qoǵamdyq birlestigi. Uıym 19 jyl buryn tirkelgen, saıası ómirde belsendi kózge túspegen jáne bir ret salyq tólegen – 2017 jyly 14 myń teńge. Satybaldydan basqa quryltaıshylardyń ishinde taǵy 9 adam bar.
Eske salaıyq,Qaırat Satybaldy merziminen buryn bostandyqqa shyǵady. 16 tamyzda Qazaqstannyń eks-prezıdenti Nursultan Nazarbaevtyń nemere inisi Qaırat Satybaldynyń jazasyn shekteý sharasyna aýystyrý týraly ótinishi qanaǵattandyryldy.
"Óskemen qalasynyń №2 soty sottalǵan Qaırat Satybaldynyń jazasynyń ótelmegen bóligin jazanyń neǵurlym jeńil túrine aýystyrý týraly ótinishhatyn qarady. Qaırat Satybaldy múlki tárkilenip, memlekettik qyzmet atqarý quqyǵynan 10 jylǵa deıingi merzimge aıyryla otyryp, 6 jylǵa bas bostandyǵynan aıyrylǵan bolatyn. Sottalǵan óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken", - dep jazdy sot.
