Almatyda memleket menshigine qaıtarylǵan aktıvterdiń biri - Kaisar Plaza saýda-keńse ortalyǵy aýksıon arqyly satylmaq. Nysandy buǵan deıin memleketke Qaırat Satybaldy tapsyrǵan, dep habarlaıdy Dalanews.kz.
Tergeý barysynda ǵımarat zańsyz jolmen alynǵany anyqtalyp, 2023 jyly Qarjy mınıstrliginiń balansyna berilgen. Endi ony Qaıtarylǵan aktıvterdi basqarý kompanıasy memlekettik aýksıon platformasynda saýdaǵa qoıady. Bastapqy baǵasy - 61 mıllıard teńge. Bul somaǵa ǵımarattyń ózin jáne jer telimin jalǵa alý quqyǵy kiredi.
Kaisar Plaza - toǵyz qabatty keshen, panoramalyq qabaty men avtoturaǵy bar zamanaýı saýda-keńse ortalyǵy. Qazir munda 53 jalǵa alýshy jumys isteıdi. Olardyń qatarynda iri bankter, buqaralyq aqparat quraldary jáne qoǵamdyq tamaqtaný oryndary bar.
Aýksıonǵa qatysý úshin 9,2 mıllıard teńge kóleminde kepildik jarna tóleý qajet. Satylym 7 sáýirde bastalady.
