الماتىدا مەملەكەت مەنشىگىنە قايتارىلعان اكتيۆتەردىڭ ءبىرى - Kaisar Plaza ساۋدا-كەڭسە ورتالىعى اۋكسيون ارقىلى ساتىلماق. نىساندى بۇعان دەيىن مەملەكەتكە قايرات ساتىبالدى تاپسىرعان، دەپ حابارلايدى Dalanews.kz.
تەرگەۋ بارىسىندا عيمارات زاڭسىز جولمەن الىنعانى انىقتالىپ، 2023 جىلى قارجى مينيسترلىگىنىڭ بالانسىنا بەرىلگەن. ەندى ونى قايتارىلعان اكتيۆتەردى باسقارۋ كومپانياسى مەملەكەتتىك اۋكسيون پلاتفورماسىندا ساۋداعا قويادى. باستاپقى باعاسى - 61 ميلليارد تەڭگە. بۇل سوماعا عيماراتتىڭ ءوزىن جانە جەر تەلىمىن جالعا الۋ قۇقىعى كىرەدى.
Kaisar Plaza - توعىز قاباتتى كەشەن، پانورامالىق قاباتى مەن اۆتوتۇراعى بار زاماناۋي ساۋدا-كەڭسە ورتالىعى. ءقازىر مۇندا 53 جالعا الۋشى جۇمىس ىستەيدى. ولاردىڭ قاتارىندا ءىرى بانكتەر، بۇقارالىق اقپارات قۇرالدارى جانە قوعامدىق تاماقتانۋ ورىندارى بار.
اۋكسيونعا قاتىسۋ ءۇشىن 9،2 ميلليارد تەڭگە كولەمىندە كەپىلدىك جارنا تولەۋ قاجەت. ساتىلىم 7 ساۋىردە باستالادى.
