Qairat Boranbaevtyń biznes seriktesine izdeý jariialandy. Ol kim, ne úshin izdeý jariialandy? Dalanews.kz materialynda.
Kásipkerdiń Qairat Boranbaevqa ne qatysy bar?
NEF Qazaqstan kompaniiasynyń quryltaishysy ári basshysy Taryk Volkan Oskaiǵa izdeý jariialandy. Aqparat Quqyqtyq statistika organdarynyń portalynda paida boldy. Bul is 18 sáýirde Almatyda tirkelgen.
Túrkiianyń týmasy Taryk Volkan Oskai Qairat Boranbaevpen birge zańsyz satyp alynǵan aktivterdi qaitarý sheńberinde memleketke berilgenge deiin Comfort Hotel Astana qonaqúi keshenin baqylaǵan "Roial Komfort Astana" kompaniiasyna ielik etken.
Oǵan qosa quryltaishysy Boranbaev sanalatyn "Almaly" (Almaly Assets Management) aktivterdi basqarý kompaniiasynda jumys istegen.
Túrik kásipkeri ne úshin izdestirilip jatqany ázirge belgisiz.
Qairat Boranbaev pen Taryk Volkan Oskai birlesip ielengen Comfort Hotel Astana qonaqúi kesheni byltyr jańa iesin tapqan edi.
Qonaqúi "Invesco PowerShares Capital Management" JShS-niń senimgerlik basqarýyna, iaǵni amerikalyq Invesco PowerShares kompaniiasynyń qazaqstandyq ókildigine berildi.
NEF Qazaqstan týraly
Aita keteiik, NEF Qazaqstan kompaniiasy túrkiialyq NEF qurylys holdinginiń quramyna kiredi.
2023 jyly kúzde NEF Qazaqstan kompaniiasy Astana International Exchange (AIX) alańynda defortqa ushyraǵan bolatyn. Kompaniia 4 mlrd teńge kólemindegi negizgi qaryz ben 402 mln teńgeden asa kýpondyq tólemdi ótei almaǵan.
Buǵan deiin bul qarjy Almaty qalasynda salynyp jatqan Green Center turǵyn úi keshenine jumsalǵany aityldy.
