Premer-ministrdiń orynbasary Ermek Kósherbaev Perizat Qairat pen onyń anasy Ǵaini Alashbaevanyń isine bailanysty pikir bildirdi, dep habarlaidy Dalanews.kz.
Úkimettegi baspasóz máslihatynda jýrnalister vitse-premerden atyshýly “Biz Birgemiz” qorynyń tóńiregindegi janjaldan keiin qaiyrymdylyq uiymdaryna tekserý júrgizile me dep surady. Ermek Kósherbaev bul salada alańdatarlyq jaittar kóp ekenin jasyrmady.
“Árine, bul másele bárimizdi alańdatady. Shyn máninde kómek kórsetip júrgen jaqsy qorlar bar. Biraq ókinishke qarai, áleýmettik jelide qaiyrymdylyqty betperde etip, senimge kirip ketkender de joq emes. Bul tek qorlarǵa ǵana emes, jekelegen azamattarǵa da qatysty. Keibiri sýret jariialap, jurt sol sátte aqsha aýdaryp jatady. Alaida bul qarajat qaida ketetinin eshkim naqty bilmeidi”, – dedi Qosherbaev.
Onyń aitýynsha, qazirgi zańnama qaiyrymdylyq qorlarynyń ishki jumysyna memleket tarapynan aralasýdy qarastyrmaidy. Sondyqtan bul salaǵa zańnamalyq turǵydan ózgeris engizý qajet.
“Bul baǵyttaǵy qyzmet tolyqtai derlik rettelmegen. Qarajattyń naqty qaida ketip jatqanyn baqylaý qiyn. Qorlardyń jumysyna memleket is júzinde aralaspaidy. Olar kóbine azamattyq nemese jeke bastamalar”, – dedi ol.
Kósherbaev Perizat Qairattyń isi jalǵyz oqiǵa emes ekenin de atap ótti.
“Mundai jaǵdailar tek quqyq qorǵaý organdary aralasqannan keiin ǵana jariia bolady. Biz tek betine shyqqan jaǵdailardy kórip otyrmyz. Basqa da qorlar bar. Keibireýler bul ispen kúnkóris kózi retinde ainalyssa, endi biri shynymen volonterlermen birge naqty kómek kórsetip júr”, – dedi vitse-premer.
Ol aldaǵy ýaqytta zańnamaǵa naqty ózgerister engizý kózdelip otyrǵanyn jetkizdi.
“Biz bul salany jan-jaqty zerttep, qajetti ózgeristerdi daiyndaimyz. Sodan keiin bul ózgerister qoǵamdyq talqylaýǵa usynylyp, Parlament qaraýyna jiberiledi. Bul baǵytty mindetti túrde retteý qajet. Azamattar óz aqshasynyń qaida ketkenin, kimge naqty kómek kórsetilgenin bilip otyrýy kerek. Bizdiń qoǵamda jomart azamattar kóp, árkim kómekteskisi keledi. Al memlekettiń mindeti – shynymen paidaly iske jumys isteitin qorlarǵa qoldaý kórsetý”, – dedi Ermek Kósherbaev.
Eske sala ketsek, buǵan deiin prokýratýra Perizat Kairatqa 10 jyl bas bostandyǵynan aiyrý, múlkin tárkilep, 10 jyl boiy qaiyrymdylyqpen ainalysýǵa tyiym salýdy suraǵan bolatyn. Anasy Ǵaini Alashbaevaǵa 8 jylǵa bas bostandyǵynan aiyrý jazasy suraldy. Aiyptalýshylar óz kinálaryn moiyndaǵan joq. Sot protsesi jalǵasyp jatyr.
