Birneshe jyl boıy Jambyl oblysynyń turǵyndary men kásipkerlerin qorqytyp kelgen uıymdasqan qylmystyq top quryqtaldy, dep habarlaıdy Dalanews.kz. 

2023 jyldyń sáýir aıynda oblys prokýratýrasynyń úılestirýimen oblystyq PD-niń qyzmetkerleri jedel is-sharalar kesheni nátıjesinde Jambyl oblysynda turaqty qylmystyq topty áshkereledi.

Buryn sotty bolǵan 7 adamnan turatyn bul qylmystyq top 2 jyl boıy qaıyrymdylyq qordyń atyn jamylyp, kásipkerlerdi qorqytý jáne olarǵa kúsh qoldaný arqyly bopsalaý, qaryzdy májbúrlep óndirip alý jáne qorǵanshylyq kórsetýmen aınalysqan.

Uıymdasqan qylmystyq topty uıymdastyrýshynyń josparyn júzege asyrý maqsatynda birqatar qylmystardyń mán-jaıy anyqtaldy, oǵan qatysýshylar (músheler) arasyndaǵy tyǵyz qarym-qatynas jáne olardyń is-áreketin úılestirý belgilendi.

Mysaly, uıymdasqan qylmystyq toptyń músheleri kóshbasshynyń nusqaýy boıynsha, ózine jáne toptyń qatysýshylaryna materıaldyq paıda tabý maqsatynda, qaryz máselesin sheshý úshin Merki aýdanynda kúsh qoldaný arqyly eki jábirlenýshiden 1 mln teńge somasyndaǵy aqsha qarajattaryn jáne jeke basyna tutyný úshin 10 keli esirtki zattaryn talap etken.

Jábirlenýshilerdiń biri ómiri men densaýlyǵy úshin qorqyp, «Kaspi» qosymshasy arqyly 500 000 teńge kóleminde qarajat aýdarǵan. Bul qarajat uıymdasqan qylmystyq toptyń qatysýshylary arasynda bólingen.

Osy tektes qylmystyq shema 4 kásipkerge de qatysty oryn alǵan.

21 qańtarda sot talqylaýynyń qorytyndysy boıynsha Jambyl oblysynyń qylmystyq ister jónindegi mamandandyrylǵan aýdanaralyq soty uıymdasqan qylmystyq toptyń basshysy men múshelerine qatysty aıyptaý úkimin shyǵardy.

Sot úkimimen uıymdasqan qylmystyq toptyńjetekshisi 11 jylǵa, basqa qatysýshylar 8 jyldan 10 jylǵa deıin bas bostandyǵynan aıyryldy.

Sottalǵandardyń kinási jasyryn tergeý áreketteriniń nátıjeleri men qylmystyq istiń basqa da materıaldarymen tolyq dáleldendi.

Sot úkimi zańdy kúshine engen joq.