Sport jýrnalisi Aslan Qajenov áleýmettik jelide Gennadii Golovkinge qatysty pikir bildirgennen keiin qysymǵa ushyraǵanyn málimdedi. Onyń aitýynsha, jumys berýshi odan qyzmetinen óz erkimen ketýdi talap etken, dep habarlaidy dalanews.kz.
"Sol kezde Gennadii Golovkinge qatysty postty almasań, efirge shyǵarmaimyz, jumystan shettetemiz, zańmen qýdalaimyz degen siiaqty ártúrli habarlama keldi. Eki kúnnen keiin «ultaralyq alaýyzdyqty qozdyrdyń» degen sebeppen sottatqaly jatyrmyz degendi taǵy jetkizdi. Amal joq, postty alyp tastadym. Otbasy bar, bala-shaǵa bar degendei", – dep jazdy ol.
Qajenov Astanaǵa oralǵannan keiin qysymnyń kúsheigenin aitady. Onyń málimdeýinshe, jumys ornynda óz erkimen qyzmetten ketý nemese birneshe bap boiynsha jaýapqa tartylý talaby qoiylǵan.
"Endi Astanaǵa kelsem, jumysta «qazir óz erkińmen qyzmetińnen ket nemese birneshe bap boiynsha sottatamyz degendi» alǵa tartady. «Habar» Agenttiginiń zańgeri kádimgidei izdenip, búkil postymdy zerdelep shyǵypty. Arasynan «qarakózder quqyǵyn qorǵamadyń» degendi ultaralyq alaýyzdyqty qozdyrý, «seniń kótińe kirmeimin» degendi jeke basyn balaǵattaý dep, kádimgi resmi aryz-shaǵymdaryn daiyndap qoiypty. Aitpaqshy, bul ister IIM-de jatyr. Eger óz erkimmen ketpesem, basyń bálege qalady degendi qadap aitty", – dedi jýrnalist.
Qajenov ózine jasalyp otyrǵan qysymnyń joǵary laýazymdy tulǵalardyń tapsyrmasymen bailanysty bolýy múmkin ekenin de jetkizdi. Alaida bul aqparatty rastaityn resmi derek ázirge jariialanǵan joq.
"Eń qyzyǵy – barlyq tapsyrmany Prezident Ákimshiligindegi bir adam berip otyr deidi. Odan keiin aqparatqa jaýapty ministrdiń tikelei tapsyrmasy degendi estidim. Jazbasy da bar", – dep málimdedi ol.
Jýrnalist óziniń sport salasyndaǵy máselelerdi kótergeni úshin qýdalaýǵa ushyraǵanyn aityp, sóz bostandyǵy men jýrnalistiń kásibi quqyǵyna qatysty saýal qoidy.
"Biz ózi qandai elde ómir súrip jatyrmyz? Qazaq sportynyń problemasyn aitý – qylmys pa? Qazaq sportshylarynyń janaiqaiyn jetkizýshi – qylmysker me? Sóz bostandyǵy qaida? Jýrnalistiń quqyǵy qaida? Sonda «Iasmina Toqsanbaevanyń, Viktoriia Grafeevanyń, Natalia Bogdanovanyń jeńisterin urlatyp, ne istep júrsińder?» degenge temir torǵa qamata ma? Onda bitken ekenbiz ǵoi", – dep jazdy Qajenov.
Memlekettik arnada 15 jyl eńbek etkenin aitqan jýrnalist Prezident Qasym-Jomart Toqaevqa úndeý jasap, máselege nazar aýdarýdy surady.
"Qurmetti, Qasym-Jomart Toqaev, bul másele Sizge jetedi jáne nazar aýdarasyz dep senemin. Memlekettik arnada 15 jyl eńbek etken qatardaǵy tilshini osynsha qysymǵa alyp jatyr. Men qarapaiym adammyn. Bireýler siiaqty tóbeden tapsyrma beretin saiasi yqpalym da joq ne azýly advokattardy jaldap qyrylatyn aqsham da joq. Biraq, obektivti túrde syn aita alamyn. Sol arqyly otandyq sporttaǵy jaǵdailardy oń baǵytta retteýge bolaryna senimdimin…", – dedi ol.
