Ombýdsmen apparatynyń jetekshisi Asqat Azarbekovtiń baspasóz jiyny kezinde «Kabar» aqparat agenttigine aitqan sózine qaraǵanda, olar Qazaqstannyń ókiletti organdarymen kezdesken.
– Qazaqstandaǵy kezdesý barysynda biz Qyrǵyzstan azamattarynyń qandai da bir tártipsizdikke nemese terror toptarǵa qatysy joq ekenin taǵy da resmi túrde málimdedik. Oqiǵa ortasynda eńbek migranttary júrse de onyń ózi kezdeisoqtyq. Bizdiń ustanymymyzdy Qazaqstan da qoldady. Sydyqov pen Rýzahýnovtyń azaptalǵany jóninde qylmystyq is qozǵaldy. Olardyń densaýlyǵyna zaqym keltirgender ádiletti jazalanady dep úmittenemiz. Tergeý ashyq jáne ádiletti ótedi dep bizdi sendirdi, – dedi Azarbekov.
Qyrǵyzstannyń Ombýdsmen institýty men Azaptaýdyń aldyn alý ulttyq ortalyǵynyń ókilderi 8 aqpanda Qazaqstanǵa barǵan.
Azaptaýdyń aldyn alý ulttyq ortalyǵynyń direktory Baqyt Rysbekovtiń sózinshe qazaq jaǵy qyrǵyz azamattarynyń azaptalǵanyn teriske shyǵarmaǵan.
Qazaqstandaǵy Qańtar qyrǵyny kezinde Qyrǵyzstannyń 10-ǵa jýyq azamaty ustalyp, bosatylǵan. Qyrǵyzstannyń eki azamaty qaza bolǵan.
Ustalǵandar arasynda Qyrǵyzstannyń belgili mýzykanty Vikram Rýzahýnov ta bolǵan. Ol Qazaqstanda qalai azap kórgenin egjei-tegjeili aityp bergen.
Almatyda Cholponbek Sydyqovty da qatygezdikpen uryp-soqqan. Qyrǵyzstanǵa oralǵan soń oǵan operatsiia jasalǵan. Dárigerler málimetine qaraǵanda, eki aiaǵy men qabyrǵasy synyp, miy shaiqalǵan.
Qazaqstandyq telearnalar 9 qańtarda eldegi mitingige qatysqany úshin aqsha aldy dep Qyrǵyzstan azamatyn kórsetken edi. Sol kúni Qyrǵyzstan IIM Qazaqstannyń Qyrǵyzstandaǵy elshisi Rapil Joshybaevqa osy jaitqa bailanysty qarsylyq notasyn tapsyrǵany habarlanǵan.
