ومبۋدسمەن اپپاراتىنىڭ جەتەكشىسى اسقات ازاربەكوۆتىڭ باسپا ءسوز جيىنى كەزىندە «كابار» اقپارات اگەنتتىگىنە ايتقان سوزىنە قاراعاندا، ولار قازاقستاننىڭ وكىلەتتى ورگاندارىمەن كەزدەسكەن.
– قازاقستانداعى كەزدەسۋ بارىسىندا ءبىز قىرعىزستان ازاماتتارىنىڭ قانداي دا ءبىر تارتىپسىزدىككە نەمەسە تەررور توپتارعا قاتىسى جوق ەكەنىن تاعى دا رەسمي تۇردە مالىمدەدىك. وقيعا ورتاسىندا ەڭبەك ميگرانتتارى جۇرسە دە ونىڭ ءوزى كەزدەيسوقتىق. ءبىزدىڭ ۇستانىمىمىزدى قازاقستان دا قولدادى. سىدىقوۆ پەن رۋزاحۋنوۆتىڭ ازاپتالعانى جونىندە قىلمىستىق ءىس قوزعالدى. ولاردىڭ دەنساۋلىعىنا زاقىم كەلتىرگەندەر ادىلەتتى جازالانادى دەپ ۇمىتتەنەمىز. تەرگەۋ اشىق جانە ادىلەتتى وتەدى دەپ ءبىزدى سەندىردى، – دەدى ازاربەكوۆ.
قىرعىزستاننىڭ ومبۋدسمەن ينستيتۋتى مەن ازاپتاۋدىڭ الدىن الۋ ۇلتتىق ورتالىعىنىڭ وكىلدەرى 8 اقپاندا قازاقستانعا بارعان.
ازاپتاۋدىڭ الدىن الۋ ۇلتتىق ورتالىعىنىڭ ديرەكتورى باقىت رىسبەكوۆتىڭ سوزىنشە قازاق جاعى قىرعىز ازاماتتارىنىڭ ازاپتالعانىن تەرىسكە شىعارماعان.
قازاقستانداعى قاڭتار قىرعىنى كەزىندە قىرعىزستاننىڭ 10-عا جۋىق ازاماتى ۇستالىپ، بوساتىلعان. قىرعىزستاننىڭ ەكى ازاماتى قازا بولعان.
ۇستالعاندار اراسىندا قىرعىزستاننىڭ بەلگىلى مۋزىكانتى ۆيكرام رۋزاحۋنوۆ تا بولعان. ول قازاقستاندا قالاي ازاپ كورگەنىن ەگجەي-تەگجەيلى ايتىپ بەرگەن.
الماتىدا چولپونبەك سىدىقوۆتى دا قاتىگەزدىكپەن ۇرىپ-سوققان. قىرعىزستانعا ورالعان سوڭ وعان وپەراسيا جاسالعان. دارىگەرلەر مالىمەتىنە قاراعاندا، ەكى اياعى مەن قابىرعاسى سىنىپ، ميى شايقالعان.
قازاقستاندىق تەلەارنالار 9 قاڭتاردا ەلدەگى ميتينگىگە قاتىسقانى ءۇشىن اقشا الدى دەپ قىرعىزستان ازاماتىن كورسەتكەن ەدى. سول كۇنى قىرعىزستان ءىىم قازاقستاننىڭ قىرعىزستانداعى ەلشىسى راپيل جوشىبايەۆقا وسى جايتقا بايلانىستى قارسىلىق نوتاسىن تاپسىرعانى حابارلانعان.
