Bas prokýrordyń orynbasary Ǵalymjan Qoigeldiev «Qyzyl kitapqa» engen qyzǵaldaqtardy julǵany úshin 12 million teńge kóleminde aiyppul salynýy múmkin Shymkent qalasynyń turǵynyna qatysty pikir aitty, dep habarlaidy Dalanews.kz
Bas prokýrordyń orynbasary qyzǵaldaqtardy julǵan áiel aiyppuldy naqty qashan tóleitini jaily habarsyz ekenin aitty.
"Bul keiinirek belgili bolady. Bir aitarym, qatal bolǵanymen, zań talaptary bar. Eger adam zańdy buzsa, aiyppul salynady. Eger adam zańdy buzbasa, aiyppul salynbaidy", - dedi Ǵalymjan Qoigeldiev Senatta tilshiler suraǵyna jaýap bere otyryp.
Osy oraida ol basqa elderde de osyndai qatal talaptar bar ekenin aityp, mysal keltirdi.
"Biz kóbinese damyǵan elderdi mysalǵa alamyz. Singapýrda adam temeki shegip, tuqylyn laqtyryp jiberse, iri kólemde aiyppul salynady. Shvetsiiada, Shveitsariiada, Frantsiiada, Germaniiada qylmystyq isterdiń 90 paiyzynda aiyppul salady jáne oǵan qosa qylmystyq jaýapkershilik bar. Eger adam urlyq jasasa, 6-7 jylǵa bas bostandyǵynan aiyrylady, ústine aiyppul salynady", - dedi Bas prokýrordyń orynbasary.
Eske salaiyq, buǵan deiin áleýmettik jelilerde Qyzyl kitapqa engen qyzǵaldaqtardy kesip, kóligine tiep jatqan áieldiń videosy taraǵan bolatyn. Keiin politsiia departamenti Túrkistan oblysy Ordabasy aýdanyndaǵy tabiǵi alqapta sirek kezdesetin, joiylyp ketý qaýpi bar qyzǵaldaqtardy zańsyz tergen Shymkent turǵyny anyqtalǵanyn málimdedi.
