Búgin Hasan Qasymbaevtyń ózi men sybaılastary sottaldy, dep habarlaıdy Dalanews.kz.
Talǵar aýdany soty málimetinshe, Q.H. basqa sottalýshylarmen aldyn ala sóz baılasyp, A.-ǵa kúsh qoldanyp, shabýyl uıymdastyrǵan. Aıyptalýshylar Q., Aq., Al., As., S. jábirlenýshi A.-ny kúshtep kólikke otyrǵyzyp, eldi mekennen tys jerge aparyp, soqqyǵa jyqqan.
Saldarynan jábirlenýshige aýyr jaraqat salǵan. Budan bólek, sot málimetinshe, Q.H. basqalarmen birge azamat T.-dan 1 000 000 teńge kólemindegi qarajatty kúsh qoldana otyryp, qorqytyp alǵan.
Aıyptalýshylardyń kinási jábirlenýshilerdiń aıǵaǵymen, oqıǵa bolǵan jerdi qaraý hattamalarymen, bettestirý nátıjesimen jáne saraptama qorytyndylarymen dáleldengen.
Sot mynadaı úkim shyǵardy:
- Q.H. uıymdastyrýshy retinde 12 jylǵa bas bostandyǵynan aıyryldy;
- Q. buryn aýyr qylmys (buzaqylyq) úshin sottalǵanyn eskere otyryp, 9 jyl 6 aıǵa bas bostandyǵynan aıyryldy;
- Aq. buryn aýyr qylmys (buzaqylyq) úshin sottalǵanyn eskere otyryp, 8 jyl 6 aıǵa bas bostandyǵynan aıyryldy;
- S. buryn asa aýyr qylmys (kisi óltirý) úshin sottalǵanyn eskere otyryp, 22 jylǵa bas bostandyǵynan aıyryldy;
- Al. jáne As. 8 jylǵa bas bostandyǵynan aıyryldy.
Úkim zańdy kúshine engen joq.
